Surya Nepal Western Open Champion
पोखरा(खेलाडी न्युज)—डिफेण्डिङ च्याम्पियन शिवराम श्रेष्ठलाई प्ले अफमा एक स्ट्रोकले पछि पार्दै नेपाल आर्मी गल्फ क्लबका धनबहादुर थापाले सुर्य नेपाल वेष्टर्न गल्फ टुरको उपाधि जितेका छन् । दुईदिनसम्म पछि परेका गल्फर थापाले अन्तिम दिन १ ओभर ७१ स्कोरको कार्ड बनाउँदै उपाधि लगभग पक्का गरिसकेका थिए । तर शिवराम श्रेष्ठले अन्तिम दिन शुक्रबार लेभल पार खेलेपछि दुवै समान २१६ स्कोरसहित टाईमा रहे । निर्णय प्लेअफमा पुग्यो । प्लेअफको प्रतिस्पर्धामा श्रेष्ठले दोस्रो होलमा बोगी खेप्दा थापाले भने पार खेल्दै उपाधि आफनो बनाए । श्रेष्ठ उपविजेतामा चिक्त बुझाउन विवश भए ।
नेपालकै निकै कठिन मानिएको पोखराको छिनेडाडाँस्थित हिमालयन गल्फ कोर्षमा शुरुभएको १८ औं सस्करणको वेष्टर्न ओपन गल्फ टुरको अन्तिम दिनको नजिताले भुवन नगरकोटीलाई तेस्रो स्थानमा ल्याईपुर्यायो । शुक्रबार तीन ओभर ७३ को स्कोरमा रहँदै कुल ९ ओभर २१९ को कार्ड बनाए । शुरुवाती दुईदिन अग्रता लिएका आर्मी गल्फ क्लबका गल्फर जयराम श्रेष्ठ र पोखराका भुबहादुर गुरुङ(भुवन) चौथो स्थानमा टाई खेलेका छन् । जयराम अन्तिम दिन खराब लयमा रहे । उपाधि जित्ने सम्भावना रहिरहँदा एकैदिन १२ बोगी खेपे ।
फ्रन्ट नाईनमा ६ र व्याक नाईनमा पनि ६ ओभर खेले । ३ र १८ औं होलमा उनी डबल बोगी खेपेको कार्डमा लेख्न बाध्य भए । ५,६ र ७ औं तथा १२, १४, १६ औं समेत बोगी खेलेपछि उपाधि होडबाट टाढिईसकेका थिए । ५४ होलको समाप्तीमा श्रेष्ठले १३ ओभर २२३ को कार्ड बनाए । दुईदिनसम्म छ ओभरमा रहदैं अगाडि बढेका गुरुङ अन्तिम दिन ७ ओभर खेलेर १८ होल पुरा गरे । रवि खड्का र भुवन रोक्का पनि १४ ओभर २२४ को स्कोरमा रहँदै टाई भए । खड्काले अन्तिम दिन मात्रै ७ ओभर खेल्दै टुग्याए । पहिलो दिन केवल १ ओभर मात्रै खेलेका उनले दोस्रो दिन ६ ओभर खेलेका थिए । सुर्यप्रसाद शर्मा र दिपक थापा मगर पनि आठौंमा टाई हुन पुगे । दुवैले ५४ होलको समाप्तीमा समान १५ ओभर २२५ को स्कोर बनाए । १७ ओभर २२७ को कार्ड बनाएका रामे मगर भने गल्फ टुरको दशौं स्थानमा रहन पुगे ।
एमेच्योर तर्फ पोखराको अजित विकले उपाधि रक्षा गरे । उनले १४ ओभर २२४ को स्कोर बनाई प्रतियोगिता टुग्याई उपाधि जित्दा सुरेश तामाङ २३३ को स्कोरमा दोस्रो स्थानमा र निरश तामाङ पनि २३३ स्कोरमै तेस्रो स्थानमा चिक्त बुझाए । वेष्टर्न ओपन गल्फ टुरमा गोकर्ण गल्फ काठमाडौं,, त्रिभवन आर्मी गल्फ काठमाडौं, निर्वाणा गल्फ कोर्ष धरान, रोयल नेपाल गल्फकोर्ष काठमाडौं र हिमालयन गल्फ कोर्ष पोखराका गरी २६ प्रो गल्फरले प्रतिस्पर्धा गरेका थिए । भोलि शनिबार प्रो—एमको प्रतिस्पर्धा हुने छ । विजेता थापाले नगद १ लाख १४ हजार, उपविजेताले ७४ हजार र तेस्रो हुने गल्फरले ५३ हजार नगद पुरस्कार पाए । २१ औं स्थानसम्मका गल्फरले नगद पुरस्कार पाएका छन् । फोटो फाईल