विराट गोल्डकप रुस्लान थ्री स्टारलाई

- खेलाडी न्युज, पोखरा


     खेलाडी न्युज    
     चैत्र २७ गते २०७४ मा प्रकाशित


विराटनगर(खेलाडी न्युज)– विराट गोल्डकपको उपाधि रुस्लान थ्री स्टार क्लबले जितेको छ । यो सँगै थ्री स्टारले सिजनको पाँचौ उपाधि उचाल्यो । नेपाल आर्मीमाथि सोमबार साँझ इज्जतिलो नजितासँगै उपाधि जित्दा पुरानो छविलाई उज्याल्याउने काम गरेको छ । आर्मी ३–० ले हराउँदै थ्री स्टार च्याम्प्यिन बन्दै मोसफलकै सर्वाधिक पुरस्कार राशी जित्ने टोली बनेको छ । पुसको अन्तिमबाट घरेलु फुटबलमा फर्केयता थ्री स्टारको यो पाँचौं नकआउट उपाधि हो । आर्मीले ७ वटा उपाधि जितेको छ ।

थ्री स्टारको जितमा विमल घर्ती मगरले २ र अर्को गोल अनन्त तामाङले गरे । पहिलो हाफ गोल रहित बराबरीमा सकियो । दोस्रो हाफ केही आक्रामक बनेको थ्रीस्टारले ५६ औं मिनेटमा गोलको खाता खोलेको थियो । रजिन धिमालको कर्नरमा अनन्तले हेडमार्फत उत्कृट गोल गर्दै टोलीलाई अग्रता दिलाए । ७६ औं मिनेटमा विमलले पेनाल्टीमार्फत गोल गरेपछि खेल २–० को अवस्थामा पुग्यो ।

आर्मीका जितेन्द्र कार्कीले डिबक्स भित्र विदेशी खेलाडी मार्टिनलाई तानेर लडाएपछि थ्रीस्टारले पेनाल्टीको मौका पाएको थियो । खेल सकिन २ मिनेट बाँकी रहँदा विमलाले अर्को गोल थपेपछि खेलमा फर्कने आर्मीको सम्भावना टुंगियो ।खेललाई पूरै नियन्त्रणमा लिएको थ्री स्टारले गोल गर्नका लागि पाएका अरु आधा दर्जन अवसरको सदुपयोग गर्न सकेन । ३८ औं मिनेटमा आर्मीका भरत खवासको प्रहार थ्रीस्टारका गोलरक्षक एलन न्यौपानेले बचाए । ४१ औं मिनेटमा टंक बस्नेतको प्रहार बाहिरिएपछि आर्मीले खेलमा लय गुमायो ।

त्यस लगत्तै आर्मीका स्टार खेलाडी नवयुग श्रेष्ठले थ्रीस्टारका खेलाडीलाई विट गर्दै गरेको प्रहारमा गोलकिपर एलन बाधक बन्दा पहिलो हाफ गोल रहित बराबरीमा सकियो । ७५ औं मिनेटमा नवयुगको प्रहारलाई सुमन अर्यालले उत्कृष्ट हेडिङ गरे पनि गोलकिपर एलन ‘क्लियर’ गरिदिंदा आर्मीले सान्त्वना गोल गर्ने अवसर पनि गुमायो । घरेलु मैदान आर्मीका कप्तान भरतका लागि अफापसिद्ध भयो । नवयुगको प्रदर्शन पनि सन्तोशजनक रहेन ।

टिमबीच सिजनमा विराट गोल्डकप चौथो भेट थियो । चौथो भेटमा एकअर्कामा बराबरी जित हारको अवस्था रहयो । यस अघि खप्तड गोल्डकपको क्वारटफाइनलमा २–१ र सिमरा गोल्डकपको फाइनलमा २–० गोल अन्तरले आर्मीले थ्रीस्टारलाई पराजित गरेको थियो । इटहरीमा सम्पन्न मदन भण्डारी अन्तराष्ट्रिय आमन्त्रण गोल्डकपको सेमिफाइनलमा भने आर्मी थ्रीस्टारसंग टाईब्रेकरमा ५–४ गोल अन्तरले पराजित भएको थियो ।

सिजनको अन्त्य हुँदा थ्रीस्टारले विराट गोल्डकपसंगै पाँचवटा उपाधि हात पारेको छ । यसले इटहरीको मदन भण्डारी, धरानको बुढासुब्बा, बुटवलको तिलोत्तमा र बुटवलकै मदन भण्डारी गोल्डकपको उपाधि यस अघि नै जितिसकेको छ । आर्मीले यस अघि विरगन्जको विशाल मेमोरियल, झापा झिलझिलेको सताक्षी, मेची नेत्रालय काँकडभित्ता, धनगढीको खप्तड, बाराको सिमरा, हेटौंडाको समुन भम्भज स्मृति र झापा गोल्डकपको उपाधिमाथि कब्जा जमाइसकेको छ ।

गोल्डकप विजेता टिम थ्रीस्टारले १२ लाख ७१ हजार रुपैयाँ नगद पुरस्कार प्राप्त ग¥यो । उपविजेता आर्मीले पाँच लाख ५१ हजार रुपैयाँमा प्राप्त गर्यो । फाइनल खेलको म्यानअफ दी म्याच थ्रीस्टारका मार्टिनले १० हजार रुपैयाँ नगद पुरस्कार पाए । प्रतियोगिताका सर्वोत्कृष्ट खेलाडी अनन्त तामाङले मोटरसाइकल प्राप्त गरे । उत्कृष्ट प्रशिक्षक थ्रीस्टारका मेघराज केसी र व्यवस्थापक मुकेश नकर्मी घोषित भए ।

उत्कृष्ट गोलरक्षक थ्रीस्टारका एलन न्यौपाने, उत्कृष्ट मिड फिल्डर थ्रीस्टारकै सुनिल बल, फरवार्ड आर्मीका भरत खवास, रक्षक आर्मीका विमल पाण्डे घोषित भए । उनीहरुले २५ हजार नगद पुरस्कार पाए । सर्वाधिक गोलकर्ता विमल घर्तीमगर ९४ गोल० ले पनि २५ हजार पाए । विजयी टिम तथा उत्कृष्ट खेलाडी, टिम, प्रशिक्षक र व्यवस्थापकलाई युवा तथा खेलकुद मन्त्री जगतबहादुर सुनार लगायतले पुरस्कार वितरण गरे ।
तस्वीर हाम्रो खेलकुद डटकमबाट