तीन खेलको लागि प्रतिभा छनोट परियोजना

पोखरा(खेलाडी न्युज)- राष्ट्रिय खेलकुद परिषदले प्रतिभा पहिचान तथा विकास परियोजना सञ्चालन गर्न जिल्ला खेलकुद विकास समितिलाई परिपत्र गरेको छ । विद्यालयस्तरदेखि नै खेलकुदको विकास गर्ने लक्ष्य सहित परिषदले भलिबल, एथलेटिक्स र कबड्डी खेलको लागि प्रतिभा पहिचानको लागि पत्रचार गरेको हो ।

भलिबलको लागि १२ जना, एथलेटिक्सको लागि १४ जना र कबड्डीको ८ जना गरी प्रतिभा छनोट गर्न नेपाल खेलकुद विज्ञान प्रतिष्ठान प्रशासन प्रमुख अनन्तादेवी खनालद्वारा परिपत्र भएको जिल्ला खेलकुद विकास समिति कास्कीका कार्यालय प्रमुख प्रकाश बरालले जानकारी दिए । परियोजना आउँदो फागुन ३ गतेदेखि सञ्चालन हुने छ । असार मसान्तसम्म सञ्चालन हुने परियोजनाको लागि स्थानीयस्तरबाटै प्रतिभा छनोटको लागि जुट्नुपर्ने देखिन्छ । १०—१२ वर्ष उमेर समूहका बालबालिकालाई खेलकुदप्रति आकर्षित गराउने उद्देश्यसहित परियोजना शुरु गरिएको हो ।