करापुटारमा पुरुष तथा महिला भलिवल प्रतियोगिता हुने

पोखरा (खेलाडी न्युज)— महाशिवरात्री पर्वको पावन अवसरमा लमजुङको मध्यनेपाल नगरपालिकाको इशानेश्वर महादेव मन्दिर परिसरमा विगतका वर्षहरु जस्तै यस वर्ष पनि भलिवल तथा छेलो प्रतियोगिता हुने भएको छ । करापुटार क्लबको आयोजनामा आगामी फागुन १ गतेदेखि ३ गते सम्म नवौँ करापुटार खुल्ला रनिङ शिल्ड महिला तथा पुरुष भलिवल एवं छेलो प्रतियोगिता हुन लागेको क्लबका अध्यक्ष कमप्रसाद गुरुङले जानकारी दिए । प्रतियोगितामा सहभागि हुने टिमले फागुन १ गते बिहान ११ बजेसम्म टिम दर्ता गर्न सक्ने गुरुङको भनाई छ । टिम दर्ता गर्न पुरुष टिमलाई २ हजार र महिला टिमलाई १ हजार लाग्ने छ भने खुल्ला छेलो प्रतियोगिताको लागि दर्ता निशुल्क रहेको अध्यक्ष गुरुङले बताए ।

पुरुष भलिवलमा प्रथम हुने टिमले नगद ५० हजार, रनिङशिल्ड, मेडल र प्रमाणपत्र पाउनेछन् । त्यस्तै द्धितिय हुने टिमले नगद ३० हजार, मेडल र प्रमाणपत्र पाउने क्लबका सचिव जाकिर हुसेन मियाले बताए । साथै सेमिफाइनलमा पराजित हुने टिमलाई नगद ५ हजार तथा प्रमाणपत्र प्रदान गरिने उनको भनाई रहेको छ । यस्तै महिला भलिवलमा प्रथम हुने टिमले नगद रु १५ हजार, रनिङशिल्ड, मेडल र प्रमाणपत्र पाउनेछन् भने द्धितिय हुने टिमले नगद रु १० हजार, मेडल र प्रमाणपत्र पाउने प्रतियोगिता संयोजक तेज बहादुर तामाङले बताए । त्यस्तै छेलो प्रतियोगितामा प्रथम हुनेले नगद १० हजार, मेडल, फेता र प्रमाणपत्र पाउनेछन् भने द्धितिय हुनेले ५ हजार, मेडल, फेता र प्रमाणपत्र पाउने आयोजकले जनाएको छ । प्रतियोगितालाई गोर्खा ब्रुअरीको टुबोर्ग बियरले मुख्य प्रायोजन गरेको छ भने मध्यनेपाल नगरपालिकाले व्यवस्थापन गरेको छ ।