रोनाल्डो र बेलको गोलमा रियल विजयी

- खेलाडी न्युज, पोखरा


     खेलाडी न्युज    
     फागुन २० गते २०७४ मा प्रकाशित


एजेन्सी—चार दिन अघि स्पानियोलसँग पराजित हुदैं स्तब्ध बनेको रियल मड्रिडले रोनाल्डोको प्रेरणादायी खेलमा गेटाफेलाई ३—१ गोलले पराजित गर्दै स्पेनिस ला लिगामा एथलेटिको मड्रिडको पछि पछि लागेको छ । रोनाल्डो विना मैदानमा उत्रिएको खेलमा स्पानियोलसँग रियल १—०ले पराजित भएको थियो । जुन पराजयले प्रशिक्षक जिनेदिन जिदानलाई समेत पीडित बनाएको थियो ।

शनिबार राती गेटाफेलाई पराजित गर्न रोनाल्डो र गारेथ बेलले नायकत्व भूमिका निभाए । गारेथ बेलले खेलको २४ औं मिनेटमा गोल गर्दै दिलाएको अग्रतालाई रोनाल्डो पहिलो हाफको इन्जुरी समयमा गोल थप्दै अग्रतालाई दोब्बर बनाउँदै पहिलो हाफ टुग्याए । बेलले ईश्कोको पासलाई सदुपयोग गर्दै बायाँ खुट्टाले हानेको सट सिधै जालीको सम्पर्कमा गएपछि रियलले खुशी मनायो ।

रोनाल्डोले पनि पहिलो हाफमै गोल गर्न भने करिम बेन्जिमाको थ्रो बललाई उपयोग गरे । उनले पनि दायाँ खुट्टाले हानेको सट पोष्टभित्र छिरेपछि रोनाल्डोले रियलप्रति आफनो भविष्यलाई अझ उज्वल बनाए । ४७ औं मिनेटमा गेटाफे दश खेलाडीमा सीमित हुन पुग्यो । लोईच रिमेले खराब फउल हिर्काएपछि दोस्रो पहेलो कार्ड पाउँदै मैदान छाड्न विवश भए । दशजनामा सीमित भएको गेटाफेले ६५ औं मिनेटमा पेनाल्टी पायो । पेनाल्टीलाई फ्रान्सिस्को पोर्टिलोले गोल गर्दै २—१ को अवस्थमा पु¥याए ।

तर रियलले दश खेलाडीमा सीमित गेटाफे विरुद्ध दबाव सृजना गरिरह्यो । ७८ औं मिनेटमा रोनाल्डोले व्यक्तिगत दोस्रो गोल गर्दै रियलमाथि न्याय गरे । मार्सेलो दिएको कर्नर पासलाई रोनाल्डोले ट्रेडमार्क हेडिङ हान्दै गोल गरे । जितसँगै रियल ५४ अंक सहित तेस्रो स्थानमा छ । एथलेटिको मड्रिड ६१ अंकसहित दोस्रो र वार्सिलोना ६६ अंकसहित शीर्ष स्थानमा छ ।