सुर्य नेपाल वेष्टर्न ओपनमा आर्मी क्लबका जयरामको अग्रता

गल्फर भुवन नगरकोटी। file pic

पोखरा(खेलाडी न्युज)—त्रिभुवन आर्मी क्लबका गल्फर जयराम श्रेष्ठले पोखरास्थित हिमालय गल्फ कोर्षमा बुधबारदेखि शुरु भएको सुर्य नेपाद वेष्टर्न ओपनको पहिलो दिन अग्रता लिएका छन् । १८ होलको समाप्तीमा उनले आज १ अण्डर ७१ को कार्ड बनाउँदै सबैलाई पछि पारे । पोखराका गल्फर भुवन गुरुङ र आर्मीकै धन थापाले समान २—२ ओभर खेल्दै ७२ को कार्ड बनाए ।

सुर्य शर्मा भने १८ औं सस्करणको वेष्टर्न ओपनको पहिलो दिन तीन ओभर खेल्न पुगे । उनले ७३ को कार्ड बनाउँदै पहिलो दिन १८ होलको समाप्ती गर्दा पोखराका सन्जीव सिके र उमेश नगरकोटीले टाई खेले । उनीहरु दुवैले ४ ओभर ७४ को स्कोरमा दोस्रो दिनको खेल शुरु गर्ने छन् । कमल तामाङले गत वर्षका रेकर्ड धारी च्याम्पियन शिवराम श्रेष्ठसँग समान ५ ओभर ७५ मा पहिलो दिनको खेल टुग्याए । पुर्व विजेता समेत रहेको रवि खड्काले भने ६ ओभर ७६ खेल्दै उपाधि दौडमा पछि पछि आएका छन् ।

एमेच्योर तर्फ भने पोखराका अजित विकले १ ओभर ७१ खेल्दै पहिलो दिन शीर्षस्थान रहदै टुग्याएका थिए । पोखराको छिनेडाडाँस्थित हिमालयन गल्फकोर्षमा २६ व्यवसायिक(प्रो)गल्फरको प्रतिस्पर्धा छ । प्रतियोगितामा १८ जना एमेच्योरले सहभागिता जनाएको हिमालयन गल्फ कोर्षका व्यवस्थापक भुवन गुरुङले जानकारी दिए । प्रतिस्पर्धामा पोखराका तीन व्यवसायिक र पाँच एमेच्योर गल्फरले प्रतिस्पर्धा गरेका छन् । प्रो तर्फ भुवन गुरुङ, कमल तामाङ, सन्जीव नेपालीको सहभागिता रहेको छ ।

गोकर्ण गल्फ काठमाडौं,, त्रिभवन आर्मी गल्फ काठमाडौं, निर्वाणा गल्फ कोर्ष धरान, रोयल नेपाल गल्फकोर्ष काठमाडौं र हिमालयन गल्फ कोर्ष पोखराका गल्फरले प्रतिस्पर्धा गरिरहेका छन् । सन १९९९ बाट शुरु भएको प्रतियोगिताको १८ औं सस्करणमा पुर्व विजेताहरुले उपाधि रक्षाको लागि प्रतिस्पर्धामा उत्रिएका छन् । शनिबार प्रो—एमको प्रतिस्पर्धा हुने छ । साढे ६ लाख पुरस्कार राशी रहेको सुर्य नेपाल वेष्टर्न ओपन विजेताले १ लाख १५ हजार नगदसहित ट्रफी पाउने छ । दोस्रो हुनेले ८५ हजार रुपैयाँ पाउने छ । २१ औं स्थानसम्म आउने गल्फरले नगद पुरस्कारको हकदार बन्ने छन् ।