आर्मी सिजनको सातौं उपाधि नजिक

- खेलाडी न्युज, पोखरा


     खेलाडी न्युज    
     फागुन २६ गते २०७४ मा प्रकाशित


विर्तामोड(खेलाडी न्युज)—लक्ष्मी हुन्डाई मनाङ मस्र्याङ्दीको चुनौतिलाई १—० गोलले पन्छाउँदै नेपाल आर्मीले सिजनको सातौ उपाधि नजिक पुगेको छ । झापा गोल्डकपको अन्तिम सेमिफाईनलमा शनिबार मनाङलाई पन्छाउन आर्मीका नवयुग श्रेष्ठले निर्णायक गोल गरे । डोमालाल राजवंशी रंगशालामा उपाधिको लागि आर्मीले आयोजक झापासँग खेल्ने छ । विजेताले १२ लाख ५१हजार नगदसहितको ट्रफी पाउँदा उपविजेताले ६ लाख नगद पुरस्कार पाउने छ ।

खेलको दोस्रो मिनेटमा नवयुग श्रेष्ठले प्रहार गरेको बल पोष्टको दायाँतर्फबाट छिरेपछि आर्मीले जितको खुशीयाली मनाउदाँ मनाङ मस्र्याङ्दी भने निराश हुन पुग्यो । अफ्रिकी खेलाडी भिक्टोरले १० औं मिनेटमा हानेको प्रहार क्रसबारमा लागेर फर्किएपछि मनाङको दुर्भाग्यको संकेत देखियो । आर्मीले फाईनलसम्मको यात्रा तय गराउन गोलकिपर विकेश कुथुले निकै महेनत गरे । उनले ५९ औं मिनेटमा विशाल राईको क्रसमा अन्जन विष्टले हानेको हेडिङलाई बचाउ गरेका थिए । कुथु म्यान अफ दि म्याचको हकदार बन्दै नगद २५ हजार रुपैयाँ पाए ।