नेपालद्वारा हङकङ पाँच विकेटले पराजित

- खेलाडी न्युज, पोखरा


     खेलाडी न्युज    
     फागुन २८ गते २०७४ मा प्रकाशित


पोखरा(खेलाडी न्युज)—मिडल अर्डर व्याट्सम्यानको प्रभावकारी प्रदर्शनमा नेपालले हङकङसँगको १३ औं भेटमा फेरीएकपटक नजिता आफनो पक्षमा पार्दा विश्वकप क्रिकेट छनोट प्रतियोगितामा प्रत्यक्ष फाईदा भने अफगानिस्तानले लिएको छ । हङकङलाई पाँच विकेटले पराजित गरेको नेपालले अब सातौं स्थानको लागि प्लेअफ खेल्दै एकदिवसीय मान्यताको लागि खेल्ने अवसर पाएको छ । अफगानिस्तान, हङकङ र नेपाल बीच समान एक एक जित भएपनि रनरेटको आधारमा अफगानिस्तान सुपर सिक्समा प्रवेश पाउँदा नेपालले भने अब सातौस्थानको लागि प्लेअफ खेल्ने छ । यसअघि नेपाल र हङकङबीच क्रिकेट इतिहासमा १२ पटक प्रतिस्पर्धा गरिसकेका थिए । ६ पटक नेपालले जित हासिल गरेको थियो भने पाँच पटक हङकङले जितेको छ । एकखेल भने पानीले रद्द हुन पुगेको थियो ।

रोहित कुमार पौडेल र सोमपाल कामीले छैटौं विकेटको लागि ८५ रनको साझेदारी गरेपनि नेपालले ४० ओभर ४ बलमा १५४ रनको लक्ष्य पुरा गर्यो । रोहितले ८६ बल खेल्दै ६ चौकाको सहयोगमा ४८ रन बनाए । उनी दुई रनले मात्रै अर्धशतक पुरा गर्नबाट बन्चित भए । सोमपालले पनि उनलाई साथ दिदैं ३७ रनको नटआउट खेल्ने क्रममा ४० बलमा चार चौका हाने । नेपाल पहिलो विकेटको रुपमा अनिल साहलाई २६ रनमा गुमाएको थियो । ज्ञानेन्द्र मल्ल १२ रनमा पवेलियन फर्किएपछि कप्तान पारस खड्का क्रिजमा उत्रिए । उनी पनि आजको खेलमा खासै उत्साहजनक प्रदर्शन गर्नबाट चुके । खड्का ११ बनाई तानविर अफजलको बलमा बोल्ड भए । दिपेन्द्रसिंह ऐरी १२ र आरिफ शेख २ रनमा आउटभएपनि नेपालको इनिङ रोहित र सोमपालले सम्हाले ।

टस जितेर व्याटिङ गरेको हङकङले नेपाललाई १५४ रनको चुनौति तेर्साएको थियो । सुपर सिक्सको सम्भावानालाई जिवितै राख्न आज नेपालले हङकङले दिएको चुनौतिलाई निकै कम ओभरमा समेट्नुपर्ने खाँचो थियो । तर नेपाल त्यसमा अफसल भएपनि प्लेअफको लागि भने योग्य बन्यो । निकै महंगा बलर बनेका करण केसीले अन्तिम समयमा दुई विकेट लिएपछि हङकङलाई ४८ ओभर २ बलमा १५४ रनमा अलआउट गर्यो् । ३.१६ को रनरेटमा हङकङले १५४ रन बनाउँदा सबैभन्दा बढी निजाकट खान ४७ रनको योगदान दिए । इसहान खानले २५ रनको योगदान दिदाँ बावर हायातले २० रन बनाई पवेलियनको बाटो समाए ।

बसन्त रेग्मी र सन्दीप लामिछानेले हङकङको रन रेट रोक्न निकै टेवा पुर्याए । सन्दीपले तीन विकेट लिदाँ ४ मेडन राखे । दश ओभर बलिङ गर्दै १७ रन खर्चिए । रेग्मीले ४ मेडन ओभर फाले । रेग्मीले १० ओभरमा दुई विकेट लिने क्रममा २४ रन खर्चिएका थिए । बसन्तले क्रिष्टोफर कार्टरलाई बोल्ड गरे । दोस्रो विकेट उनले तानविर अफजलको लिएका थिए । सन्दीले अजेज खानलाई ३ रनमा एलबी डब्लुको धरापमा पारे । लामिछानेले पनि अन्सु रथ र शसिद वासिफलाई पवेलियनको बाटो देखाएका थिए । ४७ रनमा बनाएका निजाकट खानलाई भने ललित राजवंशीले कप्तान पारस खड्कको हातबाट क्याच आउट गरिदिए । क्रिजमा लामो समय जमेर हङकङको रन उकासेका निजाकट खानको महत्वपूर्ण विकेट झरेपछि हङकङको रनरेट एकाएक ओरालो लाग्यो । बसन्त रेग्मीले तानविर अफजललाई १० रनमा पवेलियनको बाटो देखाए । अफजलको व्याट्बाट फुत्किएको बल ऐरीको हातमा पुग्यो । क्याचआउटको शिकार भए । मन्दिप सिंहलाई दिपेन्द्रसिंह ऐरीले पहिलो ओभरको बलिङको तेस्रो बलमा विकेट लिए । हङकङ कप्तान बावर हायातको विकेट भने सोमपाल कामीको नाममा लेखियो । उनले २० रन बनाई क्रिजमा जमिरहन खोजेका हायातलाई आउट गरे ।