हार्ड र क्लेकोर्टसहित प्यारपिट, चेन्जिङ रुम बनाउन बोलपत्र आह्वान

- खेलाडी न्युज, पोखरा


     खेलाडी न्युज    
     फागुन २९ गते २०७४ मा प्रकाशित


पोखरा(खेलाडी न्युज)वर्षदिनपछि साग गेम्स हुदै छ । साग गेम्सका पाँच खेल पोखरामा हुने निक्र्यौल भईसकेको छ । पाँच खेल मध्ये टेनिसको लागि आवश्यक पुर्वाधार निर्माणको लागि राष्ट्रिय खेलकुद परिषदले बोलपत्र आह्वान गरेको छ । अन्तराष्ट्रिय मापदण्ड अनुसारको टेसिनको पुर्वाधार बनाउने निर्णय अनुसार राखेपले मंगलबार बोलपत्र आह्वान गरेको हो ।

बोलपत्र अनुसार हार्ड कोर्ट, क्ले कोर्ट, २५० दर्शक क्षमताको प्यारापिट, खेलाडी चेन्जिङ रुम, शौचालयसहितको पुर्वाधार तयार गरिने छ । चेन्जिङ रुम तथा शौचालय भने अपाङ्ग मैत्री हुने छ । २०२८ सालमा पोखराको पृथ्वीनारायण क्याम्पसमा निर्मित हार्डकोर्टबाट शुरु भएको टेनिस, चार दशकपछि अन्तराष्ट्रिय भेन्युको रुपमा विकास भएको छ ।
साग गेम्सको पुर्व तयारीको लागि परिषदले ३ करोड ४५ लाखको बजेटमा ती पुर्वाधार तयार गर्ने लक्ष्य लिदैं बोलपत्र आह्वान गरेको पश्चिमाञ्चल क्षेत्रीय खेलकुद विकास समितिका इन्जिनियर प्रनिस ताम्राकारले बताए । उनका अनुसार अहिले भईरहेका क्ले कोर्टको स्तरोन्नति समेत गरिने छ ।

कास्की जिल्ला लन टेनिस संघको पहलमा पोखरा रंगशालाभित्र पाँच वटा क्ले कोर्टसहित अफिस, तथा शौचालयसहितको पूर्वाधार बनाईसकिएको छ । व्यक्तिगत लगानीमा कोर्ट निर्माण गरिएको छ । पोखरामा केही महिना अघि अन्तराष्ट्रिय टेनिस महासंघको कार्यक्रम(आईटिफ सर्किट १ र २) समेत आयोजना गरिसकिएको छ । त्यसले पनि पोखरामा साग गेम्स अन्तर्गतको टेनिस प्रतियोगिता गर्ने निर्णय भएको हो ।