च्याम्पियन्स लिगको पहिलो उपाधिको खोजीमा सिटी, रोमा र सेभिल्ला

- खेलाडी न्युज, पोखरा


     खेलाडी न्युज    
     चैत्र २ गते २०७४ मा प्रकाशित


पोखरा(खेलाडी न्युज)—च्याम्पियन्स लिगको शीर्ष आठ क्लबको टुंगो लागिसकेको छ । बार्सिलोना, रियल मड्रिड, सेभिल्ला, बार्यन म्युनिख, लिभरपुल, म्यानचेष्टर सिटी, युभेण्ट्स र ईटालियन क्लब एएस रोमाले सेमिफाईनल प्रवेशको लागि भिड्ने पक्का छन् । कसले कोसँग क्र्वाटरफाईनल खेल्ने भन्ने विषयमा खेल तालिका भने कुर्नुपर्छ । च्याम्पियन्स लिगबाट अनपेक्षित रुपमा फ्रान्सेली क्लब पेरिस सेन्ट जर्मेन, इग्लिस क्लब म्यानचेष्टर युनाईटेड बाहिरिसकेका छन् । पोर्टोले पनि बिदाई लिईसकेको छ ।

च्याम्पियन्स लिग विजेताको इतिहास हेर्दा सर्वाधिक १२ पटक रियल मड्रिडले जितेको छ । बार्सिलोना, लिभरपुल र बार्यन म्युनिखले ५—५ पटक च्याम्पियन्स लिग जितेका छन् । युभेण्ट्सले २ र अन्य तीन क्लबले उपाधि विहीन छन् । म्यानचेष्टर सिटी,सेभिल्ला र एएस रोमाले च्याम्पियन्स लिगको पहिलो उपाधि जित्ने मानसिकतामा छन् ।
सेभिल्ला र एएस रोमा पहिलो उपाधिको खोजीमा छन् । सेभिल्लाले म्यानचेष्टर युनाईटेडलाई पराजित गर्दै क्वार्टरफाईनल पक्का गरेको थियो । युभेण्ट्सले टोटनह्याम हट्सपरलाई पराजित गर्दै अन्तिम आठमा आएको हो । बार्सिलोनाले चेल्सीलाई, रियल मड्रिडले पिसएजीलाई पराजित गरेर उपाधिको खोजीमा लम्किएका हुन् । लिभरपुलले पोर्टोको चुनौतिलाई पन्छाएको थियो । रियल मड्रिडले उपाधि उचाल्दै इतिहासलाई अझ प्रभावकारी बनाउने लक्ष्यमा छ ।