नेप्लिज इन्काउन्टर्स प्रालि र कास्की जिल्ला क्रिकेट संघ बीच सम्झौता

- खेलाडी न्युज, पोखरा


     खेलाडी न्युज    
     वैशाख २० गते २०७५ मा प्रकाशित


पोखरा(खेलाडी न्युज)-नेप्लिज इन्काउन्टर्स प्रालि र कास्की जिल्ला क्रिकेट संघ बीच सम्झौता गरिएको छ । आगामी जेठमा विद्यलायस्तरीय क्रिकेट प्रतियोगिताको लागि प्रालिले संघसँग सम्झौता गरेको हो । सम्झौता अनुसार संघलाई प्रालिले मुख्य प्रायोजन वापत नगद ५० हजार रुपैयाँ उपलब्ध गराउने छ । प्रालिको मुख्य प्रायोजन रहने गरी ‘नेप्लिज इन्काउन्टर्स विद्यालयस्तरीय क्रिकेट प्रतियोगिता २०७५’ नाम दिईने बिहीबार आयोजित पत्रकार सम्मेलनमा जानकारी दिईयो ।

अहिले १२ कक्षाको परीक्षा चलिरहेको छ । १२ कक्षाको परीक्षा सकिएपछि कास्की जिल्ला क्रिकेट संघले आगामी जेठमा विद्यालयस्तरीय क्रिकेट प्रतियोगिता गर्ने निर्णय गरेको छ । प्रालिका प्रबन्ध निर्देशक नारायण पहारी र संघका अध्यक्ष सन्जयकान्त सिग्देल बीच सम्झौतापत्रमा हस्ताक्षर गरेका छन् । हस्ताक्षरपछि प्रालिका प्रबन्ध निर्देशक पहारीले क्रिकेट विकासमा निरन्तर सहकार्य गर्ने प्रतिबद्धता जनाए । सम्झौता अनुसार विद्यालयस्तरीय क्रिकेट प्रतियोगिताको लागि संघलाई प्रालिले ५० हजार रुपैयाँ उपलब्ध गराउने छ ।

संघसँग यसअघि ओम डेभलपमेन्ट बैंकले सम्झौता गरेको थियो । सम्झौता अनुसार संघले ओम डेभलपमेन्ट बैंक के.सि.एल २०७५ गर्ने छ । शनिबारदेखि प्रतियोगिता शुरुहुने छ । राउण्ड रोबिनमा खेलाईने प्रतियोगितामा पाँच क्लबको सहभागिता रहेको संघका अध्यक्ष सन्जयकान्त सिग्देलले जानकारी दिए ।