कास्की जिल्ला फुटबल संघका अध्यक्ष मिलन पक्राउ

पोखरा(खेलाडी न्युज)- गण्डकी प्रदेश सदस्य राजीव गुरुङ विरुद्ध हातपातको जाहेरी दिएका कास्की जिल्ला फुटबल संघ अध्यक्ष मिलन गुरुङलाई प्रहरीले शुक्रबार नियन्त्रण लिएको छ । अध्यक्ष गुरुङलाई बैंकिङ कसुरको आरोपमा जिल्ला प्रहरी कार्यालय कास्कीले शुक्रबार दिउँसो पक्राउ गरेको हो । उनीमाथि फर्जी चेक दिएको आरोपमा पीडितले प्रहरी समक्ष जाहेरी दिएपछि प्रहरीले दिउँसो अध्यक्ष गुरुङलाई पक्राउ गरेको हो ।

गत मंगलबार शुरु भएको गण्डकी प्रदेशस्तरीय मुख्यमन्त्री कपको उदघाटन समारोहमा प्रदेश सदस्य राजीव गुरुङ उर्फ दिपक मनाङेले उनीमाथि हातपात गरेका थिए । हातपात गरेको विरुद्धमा अध्यक्ष गुरुङले प्रहरीमा जाहेरी दिएका थिए । जाहेरीपछि प्रहरीले बिहीबार दिउँसो बसेकै होटलबाट प्रदेश सदस्य गुरुङलाई पक्राउ गरेको थियो । प्रहरीले अनुसन्धानका लागि प्रदेश सदस्य गुरुङलाई दुईदिनको म्याद थप गरेको छ । एन्फा कास्की अध्यक्ष गुरुङ लेखनाथमा सञ्चालित मुख्यमन्त्री कप लिग फुटबल प्रतियोगिताको आयोजक प्रदेश लिग कमिटिका कोषाध्यक्ष समेत हुन् ।