सनराईज राजस्थानसँग ५ विकेटले पराजित

- आईपिएल

- खेलाडी न्युज, पोखरा


     खेलाडी न्युज    
     असाेज २५ गते २०७७ मा प्रकाशित


राजस्थानका खेलाडी बललाई स्वीप गर्दै ।

दुबई-राहुल तेवातिया र रियांग पारागले छैटौं विकेटको लागि महत्वपूर्ण साझेदारी गरेपछि राजस्थान रोयल्सले सनराईज हैदरावादलाई ५ विकेटले पराजित गरेको छ । दुबईस्थित दुबई इन्टरनेशनल क्रिकेट स्टेडियममा भईरहेको भारतीय फ्रेन्चाईज लिग आईपिएलको अन्तर्गत सनराईजले दिएको १५८ रनको लक्ष्यलाई ५ विकेट गुमाउँदै जित निकाल्न सफल भयो ।

शुरुवात व्याट्सम्यान सस्तैमा आउट भएपछि मध्यम लक्ष्य पछ्याउन राजस्थानलाई निकै सकस बनेको थियो । अन्तिम ओभरमा ८ रनको खाँचो थियो । पाराग र तेवातियाले महत्वपूर्ण साझेदारी निभाए । पारागले ४२ रन र तेवातियाले ४५ रन बनाए । दुवै नटआउट रहे । तेवातियाले २८ बल खेले । ४ चौका र २ छक्का हाने । पारागले पनि २६ बल खेल्दै ४२ रन बनाए । दुई चौका दुई छक्का हिर्काए । खलिलको बलमा पारागले छक्का हिर्काउँदै एक बल बाँकी छदा लक्ष्य पुरा गर्दै खुशी मनाए ।

बेन स्टोकलाई ५ रनमा गुमाएको राजस्थान धर्मराउन शुरु गरेको थियो । जोस बटलरलाई १६ रनमा गुमाएपछि झनै समस्यामा परेको थियो । स्टेप स्थिमलाई पनि ५ रनमा गुमाएको राजस्थानलाई असजिलो अवस्थाबाट पार लगाउन सन्जु सामसनले गरे । उनले २६ रन बनाई महत्वपूर्ण योगदान दिए । खलिल अहेमद र रसिद खानले समान २/२ विकेट लिए ।

मनिष पाण्डेको अर्धशतकीय पारीमा सनराईजले १५७ रनको योगफल तयार पारेको थियो । कप्तान डेविड वार्नर र जोनी बेरिष्टोले क्रमश ४८ र १६ रन बनाउँदै राम्रै शुरुवात गर्ने प्रयास गरे । केन विलियमले २२ रन बनाए । प्रियाम गर्ग १५ रनमा रनआउट हुदैं पभेलियन फर्किए । पाण्डेले २ चौका र ३ छक्का हिर्काउँदा वार्नरको नाममा भने तीन चौका र दुई छक्का रह्यो ।