तनहुँमा बन्यो दुईवटा बास्केटबल कोर्ट

- महिला तथा पुरुष राष्ट्रिय बास्केटबल आयोजना गर्न सहज

- खेलाडी न्युज, पोखरा


     खेलाडी न्युज    
     कार्तिक ११ गते २०७७ मा प्रकाशित


तनहुँको निर्मल माविमा बनाईएको बास्केटबल कोर्ट ।

पोखरा-राष्ट्रिय खेलकुद परिषदबाट प्राप्त आर्थिक सहयोगबाट तनहुँको दमौलस्थित निर्मल माविमा दुईवटा बास्केटबल कोर्ट निर्माण गरिएको छ । विद्यालयको प्रागंणभित्र बनाईएको दुई वटा कोर्ट निर्माणले बास्केटबल खेलको विकास र विस्तारमा टेवा पुग्ने विश्वास छ ।

परिषदले उपलब्ध गराएको ४० लाख रुपैयाँबाट कोर्ट निर्माण गरिएको हो । कोर्ट अन्तराष्ट्रिय मापदण्ड अनुसार बनाईएको पश्चिमाञ्चल क्षेत्रीय खेलकुद विकास समिति पोखराका प्राविधिक ई. प्रनिस ताम्राकारले बताए । उनका अनुसार एकै ठाँउमा दुई वटा कोर्ट गण्डकी प्रदेशका अन्य जिल्लामा भने छैन् ।

निर्माणपछि पश्चिमाञ्चल क्षेत्रीय खेलकुद विकास समितिका प्राविधिक एवं कार्यालय प्रमुख लक्ष्मणप्रसाद योगी, जिल्ला खेलकुद विकास समितिका कास्कीका कार्यालय प्रमुख प्रकाश बराल लगायतको टोलीले अनुगमन तथा निरीक्षण गरेर फर्किएको थियो । ‘एउटै ठाँउमा दुई वटा कोर्ट तयार भएको छ । महिला तथा पुरुष राष्ट्रियस्तरका प्रतियोगिता आयोजना गर्न सकिन्छ ।’ पश्चिमाञ्चल क्षेत्रीय खेलकुद विकास समितिका पोखराका कार्यालय प्रमुख योगीले बताए ।

उनका अनुसार गण्डकी प्रदेशमा आयोजना हुने नवौं राष्ट्रिय खेलकुद प्रतियोगिता अन्तर्गत महिला तथा पुरुष राष्ट्रिय बास्केटबल प्रतियोगिता आयोजना गर्न सकिने छ । उनले बास्केटबलका दुवै इभेण्ट तनहुँमा आयोजना गर्न सहज हुने प्रष्ट्याए । परिषदले गत आर्थिक वर्षमा बजेट विनियोजन गरेको थियो ।