ओलम्पिक तयारीको लागि चौधरी र श्रेष्ठ बन्द प्रशिक्षणमा

- खेलाडी न्युज, पोखरा


     खेलाडी न्युज    
     पौष ११ गते २०७७ मा प्रकाशित


भारोत्तोलन बन्द प्रशिक्षण पोखरामा ।

पोखरा-जापानको टोकियोमा आयोजना हुने ओलम्पिकको तयारीको लागि भारोत्तोलनका दुई खेलाडी बन्द प्रशिक्षणको लागि पोखरा आईपुगेका छन् । प्रशिक्षक सन्जय महर्जनसँगै सन्जु चौधरी र कमला श्रेष्ठले शनिबार पोखरा आईपुगेका हुन् । उनीहरुले आईतबारदेखि पोखरा रंगशाला भारोत्तोलन संघ कास्कीमा प्रशिक्षण गर्ने छन् ।

पोखरा बन्द प्रशिक्षण आएका टोलीलाई शनिबार कास्की जिल्ला भारोत्तोलन संघले स्वागत गरेको छ । स्वागत गर्दै कास्की जिल्ला भारोत्तोलन संघका अध्यक्ष राजन बडगामीले खेलाडीहरु पोखराको बातावरणमा बन्द प्रशिक्षणमा कुनै समस्या आउन नदिने बताए ।

पश्चिमाञ्चल क्षेत्रीय खेलकुद विकास समिति पोखराका कार्यालय प्रमुख लक्ष्मणप्रसाद योगीले पोखराको बन्द प्रशिक्षण खेलाडीलाई सहज बातावरण हुने अपेक्षा गरे । प्रशिक्षक सन्जय महर्जनले पोखरामा ६ देखि ८ हप्ता बन्द प्रशिक्षण गरिने बताए । उनले नयाँ युवापुस्ता नयाँ खेलाडीलाई बन्द प्रशिक्षणको अवसरको रुपमा प्रयोग गर्न सुझाव दिए ।

उनले ओलम्पिक खेल्ने खेलाडीसँगै प्रशिक्षणको लागि समेत पोखराका खेलाडीलाई आग्रह समेत गरे । सन्जु चौधरीले ५९ केजी तौल समूहमा प्रतिस्पर्धा गर्ने छिन् । चौधरी पोखरामा आयोजित १३ औं दक्षिण एशियाली खेलकुद प्रतियोगिता(साग)मा स्वर्ण पदक विजेता खेलाडी समेत हुन् । यसैगरी कमला श्रेष्ठ भने ५८ केजी तौल समूहमा प्रतिस्पर्धा गर्ने छिन् ।

सागकै अवसरमा पोखरामा भारोत्तोलनका सबै आवश्यक सामाग्री छन् । पोखरा बाहेक अन्य ठाँउमा समेत सुविधायुक्त हलसहितको आवश्यक सामान छैन् । सागको लागि ल्याइएको सामान पोखरामै राखिएको छ । संघका अध्यक्ष बडगामीले खेलाडीलाई प्रोत्साहित गर्न सरस्वती गुरुङलाई जुत्ता समेत हस्तान्तरण गरेका थिए । संघका प्रथम उपाध्यक्ष उमेश सिकेले पोखरामा हुने बन्द प्रशिक्षणले नयाँ खेलाडीलाई प्रेरणा र हौसला मिल्ने स्पष्ट पारे । संघले भारोत्तोलनका सामानको सुरक्षा गर्न सिसि क्यामेरा समेत जडान गरिएको छ ।