प्रदेश २ लाई सान्त्वना जित

प्रदेश २ की अनुराधा चौधरीले अर्धशतक पुरा गरेपछि अभिवादन गर्दै ।

दाङ- दाङको लमहीमा जारी प्रधानमन्त्री कप महिला राष्ट्रिय क्रिकेट प्रतियोगिता अन्तर्गत आज भएको समूह चरणको अन्तिम खेलमा प्रदेश २ ले कर्णालीलाई फराकिलो रनले पराजित गरेको छ ।

प्रतियोगितामा समूह चरणबाटै बाहिरिएको प्रदेश २ ले सान्त्वना जित हासिल गर्ने क्रममा कर्णालीलाई १ सय ४३ रनले पराजित गरेको हो ।

सोमबार प्रदेश २ ले प्रस्तुत गरेको १ सय ६६ रनको विजयी चुनौतीलाई पछ्याउँदै जवाफी ब्याटिङ गरेको कर्णाली निर्धारित २० ओभर पूरै खेल्दै ९ विकेट गुमाएर २२ रन भन्दा बढी स्कोर बढाउन सकेन् ।

कर्णालीका लागि ओपनर ब्याटर त्रिशना विश्वकर्माले ७ रन र आयुशा टन्डनले अविजित रहदै ४ रन जोडिन । बलिङतर्फ प्रदेश २ का लागि सरस्वती कुमारी र कविता गौतमले समान ३(३ विकेट लिदा सन्तोषी चौधरी र आरती चौधरीले पनि १/१ विकेट लिएका थिए ।

त्यसअघि देउखुरी क्रिकेट मैदानमा टस जितेर पहिले ब्याटिङ गरेको प्रदेश २ ले निर्धारित २० ओभर पूरै खेल्दै मात्र ३ विकेट गुमाएर १ सय ६५ रन बनाएको थियो । टिमले ठूलो योगफल खडा गर्ने क्रममा उसका लागि ओपनर ब्याट्सवुमन अनुराधा चौधरीले अर्धशतकीय पारी खेलिन् ।

अविजित रहेकी उनले ६० बलमा ६ चौकासहित ६९ रन बनाइन् । टिमले सुरुवाती देखिनै राम्रो सुरुवात गरेको थियो ओपनरद्वय अनुराधा चौधरी र सोभा आले ले ६६ रनको ओपनिङ साझेदारी गरेका थिए ।

७।२ ओभरमा पहिलो विकेटका रुपमा पभेलियन फर्किएकी सोभाले २४ बलमा २ चौकासहित २३ रन बनाइन्। विमला मगरले २१ रन र सन्तोषी चौधरीले ७ रनको योगदान गरिन् । बलिङतर्फ कर्णालीका लागि निशा पराजुलीले २ तथा सुजाता बोगटीले १ विकेट हात पारिन् ।