प्रदेश १ को दोस्रो जितसँगै सेमिफाईनलमा

विकेट लिएपछि प्रदेश नं १ का खेलाडीहरु खुशीले उफ्रिदैं ।

दाङ –दोस्रो जितसँगै प्रदेश १ सेमिफाईनल पक्का बनाएको छ । प्रदेश १ ले दाङको लमहीमा भईरहेको प्रधानमन्त्री कप महिला राष्ट्रिय क्रिकेट प्रतियोगितामा लगातार दोस्रो जित हासिल गर्ने क्रममा बुधबार सुदुर पश्चिमलाई ५ विकेटले पराजित गरेको हो । सुदुर पश्चिमले प्रस्तुत गरेको ५४ रनको सामान्य लक्ष्यलाई प्रदेश १ ले १५.१ ओभरमा ५ विकेट गुमाएर पूरा गरेको थियो ।

प्रदेश १ ले संघर्षमय जित हासिल गर्ने क्रममा कप्तान रुविना क्षेत्रीले १२ रन र अप्सरी बेगमले ९ रन बनाइन् । भने निग्मा तामाङले अविजित रहदै ७ रनको योगदान गरिन् ।बलिङतर्फ सुदुर पश्चिमका लागि दिपा जोराले २ तथा कविता कुवँर र कविता जोशीले १-१ विकेट लिएका थिए ।

देउखुरी क्रिकेट मैदानमा खराब मौसमका कारण १६ ओभरमा घटाईएको खेलमा टस जितेर पहिले ब्याटिङ गरेको सुदुर पश्चिमले निर्धारित पूरै ओभर खेल्दै ८ विकेट गुमाएर ५३ रन बनाएको थियो । सुरुवात देखि खराब ब्याटिङ गरेको सुदुर पश्चिमका लागि कविता जोशीले बाहेक अन्य खेलाडीले दोहोरो अंक समेत जोड्न सकेनन् । टिमका लागि सर्वाधिक ठूलो पारी खेलेकी उनले अविजित रहदै १४ रन बनाइन् । भने ओपनर ब्याटर रेवती धामीले ८ रन र लक्ष्मी साउदले अविजित रहदै ९ रनको योगदान गरिन् ।

बलिङतर्फ प्रदेश १ का लागि संगिता राईले उत्कृष्ट बलिङ गरिन् । राईले आफ्नो ४ ओभरको स्पेलमा मात्र १० रन खर्चिएर ३ विकेट हात पारिन् । यस्तै शबनम राईले २ विकेट लिदा कप्तान रुविना क्षेत्री र निग्मा तामाङ पनि १-१ विकेट हात पारेका थिए ।