भगवतीको संघर्षपूर्ण जित,आरसिटी र कुमारीले अंक बाडे

बलको लागि सघंर्ष गर्दै ।

काठमाडौं- राजधानीमा जारी सहिद स्मारक ‘बी’ डिभिजिन लिगमा बिहीबार रानीपोखरी कर्नर टिम (आरसिटी) र श्री कुमारी क्लबले बराबरी खेल्दा श्री भगवती क्लबले झम्सीखेल युथ क्लबमाथि संघर्षपूर्ण जित निकालेको छ ।

ललितपुर स्थित अखिल नेपाल फुटबल संघ (एन्फा) मुख्यालयको मैदानमा सम्पन्न दिनको दोस्रो खेलमा आरसिटीले लिएको सुरुआती अग्रतालाई जोगाउन नसक्दा अंक बाँड्न बाध्य भएको हो । तेस्रो मिनेटमा अजित गुरुङले गोल गर्दै आरसिटीलाई अग्रता दिलाएका थिए । २२औं मिनेटमा कुमारीका युवराज राईले गोल गर्दै खेल बराबरीमा ल्याएका थिए । त्यसपछि दोस्रो हाफतिर धकेलिएको खेलमा आरसिटीले धेरै दबाब दिएर खेल देखाए पनि नतिजा निकाल्न असफल रह्यो ।

बराबरीपछि आरसिटीले ९ खेलमा १३ अंक जोडेको छ । आरसिटी लिगको पाँचौ स्थानमा छ । समान ९ खेल खेलेका कुमारीको ८ अंक छ । कुमारी आठौं स्थानमा छ ।

‘बी’ डिभिजन लिग अन्तर्गत बिहीबारै सम्पन्न दिनको पहिलो खेलमा श्री भगवती क्लबले झम्सीखेल युथ क्लबमाथि ३–२ को संघर्षपूर्ण जित निकाल्यो । सातदोबाटोमा श्री भगवतीलाई जित दिलाउन नवराज गुरुङ र मोहन बहादुर थापा मगरले एक एक गोल गर्दा एक गोल श्री भगवतीले आत्मघाती गोल उपहार पायो । झम्सिखेलका मदन स्याङतान र अनिश चौधरीले एक एक गोल फर्काएका थिए ।

निकै प्रतिस्पर्धात्मक बनेको खेलको ११ औं मिनेटमा सुनिल शाहीको आत्मघाती गोलबाट श्री भगवतीले अग्रता बुनेको थियो । तर, खेलको ३२ औं मिनेटमा मदनले गोल गर्दै झम्सिखेललाई १–१ गोलको बराबरीमा ल्याउँदा ५६ औं मिनेट नवराजले गोल गर्दै फेरि श्री भगवतीलाई २–१ को अग्रता दिलाए । ६८ औं अनिशले गोल गर्दै झम्सिखेललाई पुन २–२ गोलको बराबरीमा ल्याए । त्यसपछि दुबै टोलीले जितका लागि संघर्ष गरे । खेल सकिन ८ मिनेट बाँकी रहँदा मोहनले गोल गर्दैै टोलीलाई रोमाञ्चक जित दिलाए ।

जितसँगै श्री भगवती लिगको आठौं स्थानमा उक्लिएको छ । श्री भगवतीले ९ खेलमा ९ अंक जोडेको छ । झम्सिखेलको समान ९ खेलबाट ६ अंक छ । झम्सीखेल तालिकाको ११ औं स्थानमा छ ।

प्रतियोगितामा शुक्रबार पनि दुई खेल हुनेछन् । पहिलो खेल शीर्ष स्थानको सातदोबाटो युथ क्लब र बाँसबारी क्लब तथा दोस्रो खेल मध्यपुर युथ एसोसियसन र पुल्चोक स्पोर्ट्स क्लबबीच प्रतिस्पर्धा हुनेछ । दुबै खेल एन्फा मुख्यालयको मैदानमा हुनेछन् ।