मुम्बईको तेस्रो जित, राजस्थान ७ विकेटले पराजित

- खेलाडी न्युज, पोखरा


     खेलाडी न्युज    
     वैशाख १६ गते २०७८ मा प्रकाशित


दिल्ली, (एजेन्सी)– राजस्थान रोयल्समाथि बिहीबार ७ विकेटको जित निकाल्दै भारतमा जारी इन्डियन प्रिमियर लिग आईपिएलमा मुम्बई इन्डियन्सले तेस्रो जित हात पारेको छ ।

दिल्लीमा बिहीबार सम्पन्न खेलमा प्लेयर अफ दि म्याच घोषित भएका क्विन्टन डि ककको अविजित ७० रनको सहयोगमा मुम्बई इन्डियन्सले मुम्बईले तेस्रो जित निकालेको हो । राजस्थानले दिएको १ सय ७२ रनको लक्ष्य मुम्बईले १८.३ ओभरमा मात्र ३ विकेट गुमाएर पूरा गर्दा जारी लिगमा तेस्रो जित निकालेको हो । मुम्बईको जितमा कुर्नाल पाण्डेले ३९ रन बनाउँदा यस्तै सूर्यकुमार यादवले १६, रोहित शर्माले १४ तथा केइरन पोलार्ड १६ रनमा अविजित रहे ।राजस्थानका क्रिस मोरिसले २ विकेट लिए । मुस्ताफिजुर रहमानको नाममा एक विकेट रह्यो ।

यस अघि पहिले ब्याटिङ गरेको राजस्थानले पुरै २० ओभरमा ४ विकेट गुमाएर १ सय ७१ रन जोडेको थियो । राजस्थानका लागि कप्तान सन्जु सामसनले सर्वाधिक ४२ रनको योगदान गरेका थिए । यस्तै जोस बट्लरले ४१ रन जोड्दा शिबम डुबेले ३५ रन बनाएका थिए । याशभी जैशवालले ३२ रन जोडे । मुम्बईका लागि राहुल चाहरले २ विकेट लिए । ट्रेन्ट बोल्ट र जस्प्रित बुम्राहले १÷१ विकेट लिए ।

यस जितसँगै मुम्बईले ६ खेलमा ६ अंक जोडेको छ । मुम्बई चौंथो स्थानमा रहेको छ । राजस्थानको यो चौंथो हार हो । राजस्थानले ६ खेलमा ४ अंक जोडेको छ । राजस्थान सातौं स्थानमा रहेको छ ।