किरण सर्वाधिक क्याप जित्ने इतिहास लेख्दै

काठमाडौं- नेपाली राष्ट्रिय टोलीका गोलरक्षक तथा कप्तान किरण चेम्जोङले यसै वर्ष अन्तर्राष्ट्रिय फुटबलबाट सन्यासको घोषणा गरेका विराज महर्जनको सर्वाधिक क्याप जित्ने कीर्तिमानलाई बराबरी गरेका छन् ।-

त्रिपुरेश्वर स्थित दशरथ रंगशालामा भएको खेलमा किरणले भारतविरुद्धको पहिलो मैत्रिपूर्ण खेलमा नेपालको प्रतिनिधित्व गर्दा विराजसँगको कीर्तिमानसँग बराबरी गरेका हुन् । नेपाली टोलीका पूर्व कप्तान विराजले यस अघि नेपालका लागि ७३ क्याप जितेका थिए । विराजले यो कीर्तिमान गत चैतमा नेपालमा नै आयोजना भएको थ्री नेसन्स कपमा बनाएका थिए । सोही कीर्तिमानसँग किरणले बराबरी गरेका हुन् । विराजले थ्री नेसन्स कपपछि अन्तराष्ट्रिय खेल जिवनबाट सन्यासको घोषणा गरेका थिए ।

२००८ मा भएको एएफसी च्यालेन्ज कप छनोटमा मकाउविरुद्ध डेब्यु गरेका किरण हाल नेपाल टोलीका लागि पहिलो रोजाईका गोलकिपर हुन । पूर्व गोलकिपर रितेश थापाको स्थानमा मैदानमा प्रवेश गर्दै नेपालबाट डेब्यु गर्ने मौका पाएका थिए । त्यस यता किरण राष्ट्रिय टोलीका नियमित सदस्य हुँदै आएका छन् । भारतसँगको दोस्रो मैत्रिपूर्ण खेलमा नेपाल टोलीको कप्तानी सम्हाले किरण सर्वाधिक क्याप जित्न सक्ने खेलाडी हुनेछन् ।