बहुप्रतिक्षित भारत र पाकिस्तानको भिड्न्त आज

काठमाडौं । दुबईमा जारी आईसिसि ट्वान्टी–२० विश्वकपमा आज चिरपरिचित प्रतिद्वन्द्वी भारत र पाकिस्तानबीच प्रतिस्पर्धा हुँदै छ ।

सुपर १२ राउन्ड अन्तर्गत समूह बी को पहिलो खेलमा नै यी दुई टोलीको भेट हुन लागेको हो । विरलै मात्र आमने सामने हुने यी दुई टोलीको प्रतिस्पर्धा विश्वभरका दर्शकका लागि बहुप्रतिक्षित हुने गरेको छ ।

हालसम्म दुई टोलीबीच ट्वान्टी–२० को प्रतिस्पर्धा ५ पटक भएको छ । जसमा सबै खेलमा भारत विजयी भएको छ । भारत विराट कोहलीको कप्तानीमा मैदानमा उत्रनेछ । विराट कोहलीको कप्तानीमा खेलिने अन्तिम टी–२० प्रतियोगिता हुनेछ । यद्यपि टोली भने सार्वजनिक भएको छैन । तर यस अघि हिजो नै पाकिस्तानले बाबर आजमको कप्तानीमा पाकिस्तानले १२ खेलाडी घोषणा गरेको छ ।

टोलीमा आजमसहित मोहम्मद रिजवान, फखर जमान, मोहम्मद हफीज, शोएब मलिक, आसिफ अली, इमाद वसीम, शादाब खान, शाहीन अफ्रिदी, हसन अली, हरीस रऊफ र हैदर अली रहेका छन ।

भारत र पाकिस्तानबीचको खेल राति ७ः४५ बजे सुरु हुनेछ । भारत र पाकिस्तानबीच लामो समयबाट राजनैतिक तनाब रहदै आएको र त्यसको असर खेल क्षेत्रमा पनि देखिने गरेको छ । सोही टक्राबका कारण यी दुईलाई जित निकाल्न पर्ने भिडन्तले निकै चर्चा कमाउने गरेको छ । भारत र पाकिस्तानबीचको क्रिकेट भिडन्तलाई एक अर्काको प्रतिष्ठासँग जोडेर समेत हेरिने गरिएको छ । तर, दुबै टिम आईसीसी र एसीसीको प्रतियोगिता बाहेक एक अर्काविरुद्ध प्रतिस्पर्धा गरेका छैनन् ।

सन २०१९ को एकदिवसीय विश्वकपपछि भारत र पाकिस्तानबीच पहिलो पटक प्रतिस्पर्धा हुन लागेको हो । अझ सन २०१६ पछि ट्वान्टी–२० विश्वकप दुई टोली पहिलो पटक खेल्न लागेका हुन । सन २०१६ को विश्वकपमा भारतले पाकिस्तानलाई ६ विकेटले हराएको थियो । २०१९ को एकदिवसीय विश्वकपमा समेत भारत विजयी भएको थियो ।

यस अघि सारजाहमा हुने पहिलो खेलमा बंगलादेश र श्रीलंकाबीच प्रतिस्पर्धा हुनेछ । यी दुई टोलीको भिड्न्त भने दिउँसो ३ः४५ बजे सुरु हुनेछ । यी दुबै टिम पहिलो चरणबाट आएका हुन ।