रात्रीकालिन दौड, चुनौतिको भार

पोखरा-यही चैत अन्तिम साता पोखरामा नाईट रन(रात्रीकालिन दौड) आयोजना हुदैं छ । जुन पोखरामा पहिलो पटक आयोजना हुने छ । दौड केबल साढे पाँच किलोमिटरको हुने आयोजकले जनाएको छ ।

रात्रीकालिन दौड आयोजना गरिरहँदा चुनौति बढी रहेको औल्याइएको छ । रात्रीकालिन दौड त्यसमा पनि राती स्वयसेवक व्यवस्थापन, सवारी व्यवस्थापन, कृत्रिम प्रकाश(बत्ती)को व्यवस्थापन लगायतका चुनौति छन् । ती चुनौतिप्रति गम्भीर बन्नुपर्ने सुझाव खेल सघका पदाधिकारीले औंल्याएका छन् ।

पोखरामा नयाँ इभेण्टको रुपमा रहेको रात्रीकालिन दौड आफैंमा चुनौतिपूर्ण रहेको जिकिर उनीहरुको थियो । गण्डकी प्रदेश फेन्सिङ संघका अध्यक्ष विजय शाहीले बत्तीको समस्या, ट्राफिक व्यवस्थापन। स्वंयसेवक परिचालन लगायतका विषयमा गम्भीर बन्नुपर्नेमा जोड दिए । नेपाल पत्रकार महासंघ गण्डकीका सल्लाहकार गोविन्द सुवेदीले उक्त प्रतियोगिताको सुरक्षा चुनौती रहेको उल्लेख गरे ।

पोखरा महानगरपालिका खेलकुद विकास समितिका अध्यक्ष दीपक गोदारले प्रतियोगिता पोखरामा पहिलोपटक आयोजना हुन लागेकाले सुरक्षा व्यवस्थापन हुने कमीकमजोरीलाई आयोजकले गम्भीर हुुनुपर्ने बताए । कस्की जिल्ला एथलेटिक्स संघका सचिव सिद्धान्त अधिकारीले प्रतियोगिता साँझको समयमा हुने भएकाले कम प्रकाश भएका स्थानहरूमा पर्याप्त लाइटिङ व्यवस्थापन गर्नुपर्ने आवश्यकता औंल्याए ।

धावकहरूको भिजिबिलिटी सुनिश्चित गर्न विशेष तयारी गर्नुपर्नेमा जोड दिए । कास्की जिल्ला साइक्लिङ संघका अध्यक्ष शंकर भण्डारीले दौड मार्गमा रहेका खाल्डाखुल्डी तथा नालाहरूको पुनः अवलोकन गरी आवश्यक मर्मत तथा स्ल्याब राख्न सुझाव दिए । रात्रीकालिन दौडमा तीन इभेण्ट हुने छन् । महिला तथा पुरुष खुल्ला दौड र सोह्रवर्ष मुनिकाका इभेण्ट रहने प्रतियोगिताका संयोजक दिननाथ बरालले जनाए ।