बस डेको अविजित इनिङमा नेदरल्याण्डको जित

नेपाल विरुद्ध विकेट लिएपछि नेदरल्याण्डका खेलाडीहरु खुशी साट्दै ।

पोखरा-१८ औं र १९ औं ओभरमा ३९ रन खर्चिएपछि नेपालले नेदरल्याण्ड विरुद्धको दोस्रो खेल सम्भावित जितबाट टाढिदैं तीन विकेटले पराजित हुन पुगेको छ । १८ औं ओभरमा सन्दीप लामिछानेले २० रन खर्र्चिए । त्यही ओभरमा एक विकेट लिए । १९ औं ओभरमा अभिनास बोहोराले पनि एक विकेट लिदैं १९ रन खर्चिए । जुन नेपालको लागि निकै महंगो सावित हुन पुग्यो । नेदरल्याण्डले तीन बल बाँकी छदाँ नेपालले दिएको २०७ रनको लक्ष्यलाई ७ विकेटको क्षतिमा पुरा गर्दै पहिलो दिनको हारको बदला समेत लिएको छ ।

शुरुदेखि नै आक्रामक व्याटिङमा उत्रिएको नेदरल्याण्डलाई जितसम्म डोहोर्याउन बस डे लिडेले अविजित ८१ रन खेले । ओपनिङमा आएका उनले अन्तिम ओभरमा करण केसीलाई दुई चौका प्रहार गर्दै जितको हकदार बनाए । उनले ४२ बलमा ७ चौका र ५ छक्का हिर्काउँदै जित निकाल्दै नेपालमाथि ३ विकेटको जित दर्ता गरे । नेदरल्याण्डका लागि बेन कुपरले पनि अर्धशतीय पारी खेल्दै उत्कृष्ट प्रदर्शन देखाए । उनले ५५ रन बनाए । ३५ बलमा १० चौका उनको व्याटबाट निस्कियो । पिटर सिलरले ३१ रनको योगदान दिए । नेपालका बलर सन्दीप लामिछानेले ४ ओभरमा ४८ रन खर्चिएर ४ विकेट लिए । करण केसी, कुशल मल्ल र अभिनास बोहोराको नाममा पनि एक एक विकेट लेखियो ।

तीन देश बीचको त्रिकोणात्मक टी–२० सिरिजमा नेदरल्याण्ड विरुद्ध पनि उत्कृष्ट प्रदर्शनलाई निरन्तरता दिए । मंगलबार नेदरल्याण्डसँगको दोस्रो खेलमा ६२ रनको पारी खेल्दै उत्कृष्ट ओपनर व्याट्सम्यानको पुष्टि गरेका छन् । भुर्तेलले उपकप्तान दिपेन्द्रसिंह ऐरीसँग ७८ रनको साझेदारी निभाउँदै महत्वपूर्ण इनिङ्ग खेले ।

भुर्तेलले आफना ओपनर जोडी आशिफ शेखसँग भने मंगलबार शतकीय साझेदारी गर्नुबाट चुके । शेख शून्य रनमै पभेलियन फर्किएपछि भुर्तेलले तेस्रो विकेटको रुपमा क्रिज छिरेका ऐरीसँग साझेदारी निभाए । कप्तान ज्ञानेन्द्र मल्ल २० रनमा आउट भएपछि भुर्तेल र ऐरीले नेपालको इनिङ्ग सम्हालेका थिए । भुर्तेलले ६२ रनको पारी खेल्ने क्रममा ४६ बलको सामना गरे । ८ चौका र १ छक्का हिकाए । भिभिन किङ्गमाले बस डि लिडेको हातबाट क्याच गराएपछि भुर्तेलले क्रिज छाडे । ऐरीसँग साझेदारी टुट्नु अघि दुवैले शतकीय पारी खेल्ने सम्भावना देखाएका थिए । ऐरीले ६० रन बनाए । ३० बल खेल्ने क्रममा ३ चौका र ५ छक्का प्रहार गरे । उनी पनि पिटर सिलरको बलमा टोवियास भिसेको हातबाट क्याच हुन पुगे ।

कुशल मल्ल १८ रनमा आउट भए । विनोद भण्डारी र सोमपाल कामीको जोडी नटआउट रहँदै क्रमश ७ र र २१ रन बनाए । नेदरल्याण्डका पिटर भिभियनले समान दुई/दुई विकेट लिए । नेपालले टस जितेर व्याटिङ गर्ने क्रममा छ विकेटको क्षतिमा २०६ रन बनाएको थियो ।