पिएसजीको मैदानमा रियलको शान

एजेन्सी—पेरिस सेन्ट जर्मेनलाई उसैको घरेलु मैदानमा पराजित गर्दै रियल मड्रिडले च्याम्पियन्स लिगको अन्तिम आठमा आफनो स्थान सुरक्षित गरेको छ । आफना महंगा स्ट्राइकर नेयमारको अनुपस्थिति र आधा घण्टा बढी दशजना खेलाडीमा सीमित पिएसजीलाई दोस्रो लेगमा २—१ गोलले पराजित गर्दै समग्रमा ५—२ ले जित्दै च्याम्पियन्स लिगको क्र्वाटरफाईनल निश्चित गर्यो ।

क्रिष्टियानो रोनाल्डोको गोलबाट लिएको अग्रता रियल मड्रिडले ८० औं मिनेटमा कासिमिरोले गरेको गोल निर्णायक बन्यो । ५१ औं मिनेटमा लुकास भाज्क्वेजले दिएको क्रसमा रोनाल्डोले हेडिङ गर्दै रियललाई अग्रता दिलाए । ६६ औं मिनेटमा दश खेलाडीमा सीमित हुन पुग्यो पिएसजी । मार्को भेराट्टीले दोस्रो पहेलो कार्ड खाँदै मैदान छाडेपछि दश जनामा खेलेको पिएसजीले भने ७१ औं मिनेटमा बराबरी गोल गर्दै दर्शकको हौसला आत्मसात गर्यो ।

एडिसन काभानीले पोष्ट नजिकै पाएको बललाई पोष्टको दिशा दिएपछि पाहुना टोली रियलसँग बराबरी गर्दै आशा जाग्यो । खेलाडी अभावलाई टार्दै गोल गरेपनि अन्तिम समयसम्म भने अभाव भने खड्कियो । रोनाल्डोले दिएको पासमा कासिमिरोले गोल गर्दै रियलको जित सुनिश्चित गरे । जितसँगै २० वर्षपछि फ्रान्स फर्किएका रियलका प्रशिक्षक जिनेदिन जिदानको यात्रा पनि सुखद रह्यो । रियलले ८६, ८७ र ९० औं मिनेटमा पाएको अवसरलाई गुमाउँदा गोल अन्तर बढ्ने सम्भावना न्युन हुन पुग्यो । दुई अवसर रोनाल्डोले मिलाएका थिए । तर लुकास भाज्क्वेज र ईश्कोले हानेको प्रहार खेर गएको थियो ।