कोरियाले टुग्यायो जर्मनीको रसिया विश्वकपको यात्रा

एजेन्सी-अतिरिक्त समयमा दुई गोल गरेपछि कोरियाले विश्वकप विजेता जर्मनीमाथि रवाफिलो जित मात्रै निकालेन् । रसिया विश्वकपबाट बाहिरिने टोलीमा जर्मनीको नाम समेत समावेश गरिदिएको छ ।

सन १९९८ मा विश्वकप उचालेको फ्रान्स सन २००२ मा पहिलो चरणबाटै बाहिरिएको इतिहासलाई जर्मनीले पनि उस्तै गरी दोहोर्यादाँ रसिया विश्वकपबाट दुखद विदाई लियो । उपाधि दाबेदारिको रुपमा हेरिएको जर्मनीको अप्रत्यासित हारले कोरिया विश्वकप फुटबलमा आफनो छविलाई उचाईमा पु्रयायो ।

उता जर्मनीसँग पराजय भएको स्वीडेनले मेक्सिको माथि महत्वपूर्ण जित निकाल्दै अन्तिम १६ को स्थान पक्का गर्यो । स्वीडेन र मेक्सिको दुई दुई जितसँग ६ अंक जोड्दै नकाउट चरणमा प्रवेश गर्दा कोरियाले जर्मनीलाई पराजित गर्दै ३ अंक लिदैं अंक विहीनको अवस्था अन्त्य गरेको छ ।

९० मिनेटको खेलपछि थपिएको अतिरिक्त समयमा कोरियाले २ गोल हिर्काएपछि जर्मनीको यात्राले विट मार्यो । ९० प्लस २ मिनेटमा किम योङ ग्वोनले गोल गरे । अर्को गोल भने ९० प्लस ६ मिनेटमा सन ह्युङ मिनले गोल गरेपछि जर्मनीको दुखद विदाई हुन पुग्यो । कोरिया स्वीडेन र मेक्सिकोसँग पराजित भएको थियो । स्वीडेनले मेक्सिकोलाई महत्वपूर्ण खेलमा ३-० गोलले पराजित गर्दै शीर्षस्थनमा रहेर नकाउट चरण प्रवेश गरेको छ ।