माघ १ गतेदेखि तनहुँमा सर्वाधिक पुरस्कार राशीको भिमाद कप

खेलाडी न्युज,पोखरा, २७ पुस-  माघे संक्रान्तिको अवसरमा तनहुँको भिमादमा क्लबस्तरीय नकाउट फुटबल प्रतियोगिता हुने भएको छ । युवा क्लब भिमादको आयोजनामा माघ १ गतेदेखि हुने तेस्रो भिमाद कप फुटबल प्रतियोगितामा विभिन्न १२ टोलीले प्रतिस्पर्धा गर्ने छन् । पोखरामा आयोजना हुने आहा रारा गोल्डकप पछिको प्रदेश नं ४ कै सर्वाधिक पुरस्कार राशीको प्रतियोगिताको आवश्यक तयारी पुरा भएको प्रतियोगिता संयोजक एवं क्लबका पुर्व सदस्य विश्व सुवेदीले बताए ।

प्रतियोगितामा काठमाडौंबाट ब्वाईज युनियन, स्वयंभु क्लब, झापा ११, पोखरा ११, हेमजा(पोखरा), नेपाली सेनाको खैरेनी व्यारेक, दमौली, दुलेगौडा, बेल चौतारा र आयोजक युवा क्बल भिमादको दुई टोलीले प्रतिस्पर्धा गर्ने छन् । प्रतियोगितामा विजेता टोलीले नगद ३ लाख रुपैयाँसहित कप पाउने छ । उपविजेताले भने एकलाख ५० हजार रुपैयाँ पाउने आयोजकले जनाएको छ ।

सर्वोत्कृष्ठ खेलाडी, उत्कृष्ठ गोलकिपर, डिफेन्स, मिडफिल्डर, स्ट्राईकर र सर्वाधिक गोलकर्तालाई जनही १०÷१० हजार नगदबाट सम्मानित गरिने छ । प्रतियोगिताको लागि २५ लाख खर्च हुने अनुमान गरिएको छ । विदेशमा भएका भिमादबासीले आर्थिक सहयोग उपलब्ध गराएका छन् । स्थानीयस्तरबाट समेत सहयोग प्राप्त भएको समेत उनको भनाई थियो ।