मौजामा फुटबल मैदान बनाउनुपर्छ-बोर्ड सदस्य श्रेष्ठ

निर्माणाधिन मौजाको फुटबल मैदान । खेलाडी न्यूज ।

पोखरा-माथि जंगल छ । तल बस्ती छ । अलि परे हेर्यो भने पोखराको बजार देखिन्छ । त्यतिमात्रै नभई पोखरा रगशाला प्रत्यक्ष नियाल्न सकिन्छ ।

पोखरा २० मौजामा पोखराकै उचाईमा फुटबल मैदान बन्दै छ । मैदानबाट हिमाल छर्लङ्गै देखिन्छ । मौजामा १७ सय मिटरको उचाईमा फुटबल मैदान निर्माण गर्ने कार्य अगाडि बढाइएको छ । पोखरा महानगरपालिकाले यो आर्थिक वर्षको लागि ५० लाख रुपैयाँ विनियोजन गरेको छ । त्यसभन्दा अघि नै ८ लाख रुपैयाँको लागतमा जमिन कटान गरेर सम्याउने काम गरिएको थियो । तर बजेट अभावले काम अगाडि बढ्न सकेको थिएन् ।

महानगरले बजेट छुट्टाएपछि काम अघि बढेको छैन् । यतिबेला कोरोना कहर छ । कहरकै कारण थप काम भने हुन सकेको छैन् । फुटबल मैदान निर्माण गर्न राष्ट्रिय खेलकुद परिषदका बोर्ड सदस्य सम्पन्न श्रेष्ठले प्रत्यक्ष निरीक्षण गरेर फर्किएका छन् । निरीक्षण गरेर फर्किएपछि श्रेष्ठले भने—‘फुटबल मैदान निर्माण गर्न उपयुक्त छ । प्राकृतिक दृष्टिकोणले निकै रमणीयस्थल छ ।’ उनका अनुसार पोखरासँगै जोडिएको मौजामा फुटबल मैदान निर्माणसँगै खेलाडीलाई होम स्टेमा राखेर प्रतियोगिता सञ्चालन गर्न सकिन्छ ।

उनले युवा तथा खेलकुद मन्त्री जगतबहादुर विश्वकर्मा(सुनार)ले नै मौजा खेलमैदानको निरीक्षण गरेर खबर गर्न निर्देशन गरेपछि आफुले निरीक्षण गरेर फर्किएको प्रष्ट्याए । ‘फुटबल मैदान बनाउन जरुरी छ । त्यसमा पनि अझ मौजामा बनाउन अझै उपयुक्त देखिन्छ’ उनले थपे—‘प्राकृतिक सौन्दर्यताले खेलाडीको मनै लोभ्याउँछ ।’

मैदान निर्माण गर्न महानगरपालिकाले छुट्टाएको बजेटबाट काम अघि बढाउनुपर्नेमा जोड दिए । उनले महानगरपालिकाको बजेटबाट शुरु गरिएको कामलाई फत्ते गर्न राष्ट्रिय खेलकुद परिषद र युवा तथा खेलकुद मन्त्रालय तथा प्रदेश सरकारसँग थप बजेटको लागि लबिङ गरिने स्पष्ट पारे ।
डेढवर्ष अघि मैदानको डिपिआर तयार गरिएको छ । डिपिआर अनुसार १६ करोड रुपैयाँ लागत अनुमान गरिएको छ ।

डिपिआरमा फुटबल मैदानसहित पार्किङ, दर्शक प्यारापिट, चेन्जिङ रुम तथा अन्य खेलकुद पूर्वाधार समेत समेटिएको छ । पोखरा—२० भलाम मौजाका वडाध्यक्ष सीम गुरुङले फुटबल मैदान निर्माणपछि ग्रामीण क्षेत्रमा स्पोर्टस टुरिज्म विकास हुने अपेक्षा गरे ।

‘फुटबल प्रतियोगितासँगै गाँउसम्म पुग्ने बाटोको स्तरोन्नति शुरु गरिएको छ । यातायातको सहज पहुँच पुगेपछि प्रतियोगिता आयोजना गर्न सकिन्छ । होमस्टेमा राखेर ग्रामीण पर्यटन प्रवद्र्धन गर्न सकिन्छ ।’उनले भने—‘त्यसको लागि सबै तह र तप्काबाट सहयोग हुन जरुरी छ ।’ फुटबल मैदान निर्माणपछि पोखराकै सबैभन्दा उचाईमा रहेको फुटबल मैदान हुने छ ।