मुख्य प्रशिक्षकपछि प्रदेश क्रिकेट प्रशिक्षक छनोट

- खेलाडी न्युज, पोखरा


     खेलाडी न्युज    
     कार्तिक २९ गते २०७७ मा प्रकाशित


नेपाल क्रिकेट संघ(क्यान) लोगो ।

पोखरा-पोखरामा क्रिकेट प्रशिक्षक नभएको लामै समय भयो । ६० को दशकमा पोखराको क्रिकेटलाई उचाईमा पुर्याउने जिम्मेवारी जगत टमटाको काँधमा थियो । उनको पनि दुईचार वर्षे बसाईपनि राजधानी हुँईकिए । राजधानी हुँईकिएपछि पोखरा क्रिकेट प्रशिक्षकको अभावमा टुहुरो बन्यो । केही समय भैरहवाबाट जंगबहादुर थापा काजमा आएर नसिकाएका पनि होईनन् । तर थापा बर्षदिनपनि बसेनन् ।

लामो समय प्रशिक्षकविहीन टुहुरा बनेको पोखराले क्रिकेट प्रशिक्षक सम्भव मंसिर भित्रमा पाउने छ । तर पोखरालाई नभई गण्डकी प्रदेशलाई । प्रदेशको केन्द्र विन्दु पोखरामा रहेर नयाँ प्रशिक्षकले क्रिकेटको विकास र विस्तारमा आफनो दिलोज्याउन लगाउनेमा कास्की जिल्ला क्रिकेट संघ विश्वस्त छ ।

शुरुवाती समयमा क्रिकेट मैदानको अभाव थियो । क्रिकेट प्रशिक्षक थिए । अहिले मैदान व्यवस्थित छ, प्रशिक्षक छैनन् । प्रशिक्षक बिना नै पोखरा(तत्कालिन क्षेत्र नं ८) राष्ट्रिय प्रतियोगितामा आफुलाई उम्याउँदै आएको छ । अस्थायी प्रशिक्षकको रुपमा टिम सम्हाल्नुपर्ने बाध्यता स्वयसेवक प्रशिक्षकको काँधमा आयो ।

नेपाल क्रिकेट संघले मुख्य प्रशिक्षकको छनोटको तयारीमा छ । अन्तरवार्ता मार्फत नेपाली क्रिकेटलाई माथि उठाउने प्रशिक्षक छनोटपछि प्रदेशस्तरीय क्रिकेट छनोट शुरु हुने छ । प्रदेशस्तरीय क्रिकेट प्रशिक्षक बन्ने दौडमा चार छन् । चार जनामध्ये दुई जना पोखराका प्रशिक्षक छन् । रिजन प्रजु र दिपेश खत्री प्रदेश प्रशिक्षक बन्ने दौडमा रहेको नेपाल क्रिकेट संघका केन्द्रीय सदस्य ऋषिराम गौतमले सुनाए । उनीहरुसँगै अन्य दुई जनाले पनि चासो दिएको उनले जानकारी दिए । अन्य दुईजना भने पोखरा बाहिरका हुन् ।

खत्री पूर्व अन्तराष्ट्रिय क्रिकेट खेलाडी हुन् । लामो समय नेपाली क्रिकेटमा भिजेका छन् । प्रजु प्रदेशकै विभिन्न समयमा स्वयंसेवक प्रशिक्षक बन्दै विभिन्न राष्ट्रिय प्रतियोगितामा टिम सम्हाल्ने मौका पाएका छन् । प्रजु दृष्टिविहीन प्रशिक्षक समेत रहेर अनुभव लिईसकेका छन् । कास्की जिल्ला क्रिकेट संघ कास्कीले पनि पोखराको क्रिकेटलाई बुझेको व्यक्ति प्रशिक्षक बन्नुपर्ने धारणा राख्दै आएको छ ।