एकवर्षभित्रमा पोखरा रंगशाला निर्माण गरिने

पोखरा-आर्थिक वर्ष २०७८/७९ को लागि खेलकुद क्षेत्रको विकास र विस्तार गर्न सरकारले २ अर्ब ७४ करोड बजेट विनियोजन गरेको छ ।

सरकारले खेलकुद क्षेत्रको विकास र विस्तारको लागि आगामी वर्ष पोखरा रंगशाला निर्माण कार्यलाई पुरा गर्ने योजना बनाएको छ । तीन वर्ष अघि पोखरा रंगशाला(फुटबल मैदानसहित प्यारापिट निर्माण) शुरु गरिएको थियो । एक अर्ब २८ करोडको बजेटसहित शुरु गरिएको योजना एक बर्ष कोरोना कहरसँगै काम रोकिन पुगेको थियो ।

सरकारले यसै वर्ष नवौं राष्ट्रिय खेलकुद प्रतियोगिता आयोजना गर्ने उल्लेख समेत गरेको छ ।नवौं राष्ट्रिय खेलकुद प्रतियोगिता पोखरामा आयोजना गरिने छ । तीन वर्ष अघि नेपालगन्जमा आठौं राष्ट्रिय खेलकुद प्रतियोगिता समापनसँगै राष्ट्रिय खेलकुद प्रतियोगिताको जिम्मेवारी सहित झण्डा बोकेर ल्याएको थियो । आवश्यक खेलकुद पूर्वाधार निर्माणमा ध्यान दिएको दावी समेत गरेको छ । दुई वर्षभित्रमा झापाको मदन भण्डारी रंगशाला निर्माण पुरा गर्ने अर्थमन्त्री विष्णु पौडेलले शनिबार बजेट बक्तव्य सार्वजनिक गर्दै बताए । मुस्ताङको जोमसोममा हाईअल्टिच्युड खेल मैदान निर्माण गर्ने योजना सरकारले बनाएको छ ।

नवौं राष्ट्रिय खेलकुद प्रतियोगिताकै लागि पोखरामा स्वीमङ पुल तथा सुटिङ रेन्ज निर्माण गर्नुपर्ने खाँचो छ । नवौं राष्ट्रिय खेलकुद प्रतियोगिताकै लागि मन्त्रालयले गण्डकी प्रदेशका विभिन्न जिल्लाका खेलकुद पूर्वाधार निर्माणको लागि २ करोड २० लाख रुपैयाँ छुट्टाएको थियो । स्वीमिङ र सुटिङ रेन्जको ५०र५० लाख रुपैयाँ भने फिर्ता भएको छ । कोरोना कहरकै कारण दुई योजना कार्यान्वयनमा ल्याउन राष्ट्रिय खेलकुद परिषदले बोलपत्र आह्वान गर्न सकेन् ।

काठमाडौंको मुलपानी, दाङ, रुपन्देही लगायतका जिल्लामा क्रिकेट रंगशाला निर्माण गरिने समेत अर्थमन्त्रीले उल्लेख गरे । तर पोखरा रंगशालाभित्रको क्रिकेट मैदानको स्तरोन्नति बनाउने तर्फ भने सरकारको ध्यान गएको छैन् । गत आर्थिक वर्षको लागि सरकारले खेलकुदलाई २ अर्ब ३६ करोड छुट्टाएको थियो ।