गण्डकी प्रदेश सुदुर पश्चिमसँग पराजित

गण्डकी प्रदेश र सुदुर पश्चिम कप्तान ।

दाङ -प्रधानमन्त्री कप महिला क्रिकेट प्रतियोगितामा गण्डकी प्रदेश सुदुर पश्चिम प्रदेशसँग ५९ ले पराजित भएको छ । दाङको लमहीस्थित क्रिकेट मैदानमा मंगलबार भएको प्रतिस्पर्धामा १०८ रनको लक्ष्य पछ्याएको गण्डकी प्रदेश केवल ४८ रनमा समेटिदैं पराजित हुन पुग्यो ।

ब्याटिङतर्फ गण्डकी प्रदेशका लागि कुनै ब्याटरले दोहोरो अंक स्कोर बोर्डमा चढाउन सकेनन् । उसका लागि सृष्टि पौडेलले ८ रन र ज्योत्सनिका मरासिनीले अविजित रहदै ६ रन जोडिन । बलिङमा सुदुर पश्चिमकी सुनिता लोहारले २ विकेट हात पार्दा कविता कुवँर, रितु कनौजिया र लक्ष्मी साउदले १-१ विकेट लिएका थिए।

टस जितेर पहिले ब्याटिङ गरेको सुदुर पश्चिमले १९.३ ओभरमा आफ्नो सबै विकेट गुमाएर १ सय ७ रन बनाएको थियो ।

टिमले उक्त योगफल खडा गर्ने क्रममा उसका लागि ओपनर ब्याटर रेवती धामीले सर्वाधिक ठूलो पारी खेलिन् । ३६ बलको सामना गरेकी उनले २ चौकासहित २७ रन बनाएकी थिइन् । रेवती बाहेक टोलीका लागि कप्तान विन्दु रावलले १३ रन , ओपनर ब्याटर मन्जु बोगटीले १० रन र रुवि पोदारले ५ रन बनाएकी थिइन् ।

बलिङतर्फ गण्डकी प्रदेशका लागि सृष्टि पौडेल र अलिशा लामिछानेले ३/३ विकेट हात पारे । भने अञ्जली विश्वकर्माले पनि पनि १ विकेट लिन सफल भइन् । यता प्रतियोगितामा समूह ए बाट एपीएफ र लुम्बिनी प्रदेश सेमिफाइनल पुगेका छन् ।