सुरेश र अनिशा क्रस दुवाथोलन च्याम्पियन

पुरुष दुवाथोलन च्याम्पियन सुरेश भुजेल ।

पोखरा-नेपाल ट्रायथोलन संघको आयोजनामा काठमाडौंको टोखामा आयोजित पुरुष क्रस दुवाथोलनको उपाधि सुरेश भुजेलले जितेका छन् । महिला तर्फको प्रतिस्पर्धामा अनिशा गुरुङले उपाधि आफनो नाममा लेखाईन् ।

शनिबार टोखा गणेशस्थानदेखि चण्डेश्वरीसम्म आयोजित क्रस दुवाथोलनमा भुजेलले ३५ मिनेट ४० सेकेण्डमा पुरा गदैै उपाधि जिते । त्यसैगरी प्रेमसिंह मोयालले ३७ मिनेट ०८ सेकेण्डमा पुरा गर्दै दोस्रो र ३७ मिनेट १३ सेकेण्डमा पुरा गर्दै आईतसिंह तामाङ तेस्रो स्थानमा रहे ।

त्यसैगरी महिला तर्फको प्रतिस्पर्धामा अनिशा गुरुङले ४३ मिनेट ५४ सेकेण्डमा पुरा गर्दै च्याम्पियन बनिन् । ४८ मिनेट ४३ सेकेण्डमा पुरा गर्दै सुधा राई दोस्रो स्थानमा रहँदा ५२ मिनेट ३४ सेकेण्डमा पुरा गर्दै युस्का महर्जन तेस्रो भईन् । विजेता खेलाडीलाई विभिन्न संघसंस्थाले प्रायोजित गिफ्ट ह्याम्पर प्रदान गरिएको थियो । टोखा नगरपालिका वडा नं २ का वडाध्यक्ष दिपकराज जोशीले गिफ्ट ह्याम्पर प्रदान गरेका थिए । क्रस दुवाथोलन २ दशमलव ५ किलोमिटर दौड, १० किलोमिटर साईक्लिङ र १ दशमलव ५ किलोमिटर दौड रहेको थियो ।

प्रतियोगिताको लागि जम्प नेशनसँग संघले एक वर्षे सम्झौता गरेको छ । सम्झौता अनुसार जम्प नेशनले प्रायोजन गर्ने छ । प्रतियोगितामा राष्ट्रिय खेलाडीको सहभागिता गराईएको थिएन् । युवा एवं नयाँ खेलाडी उत्पादन गर्ने लक्ष्य अनुसार नेपाल ट्रायथोलन संघले प्रतियोगिता आयोजना गरेको संघका अध्यक्ष निलेन्द्रराज श्रेष्ठले जनाए । पुरुष तर्फ २० र महिला तर्फ ५ खेलाडीले प्रतिस्पर्धा गरेका थिए ।

अबको दुईसातापछि दुवाथोलन सिरिज अन्तर्गत किर्तिपुरमा आयोजना गरिने संघले जनाएको छ । किर्तिपुरमा आयोजनाको दुईसातापछि ललितपुरको गोदावरीमा र तेस्रो प्रतिस्पर्धा टोखामै आयोजना गरिने छ । सिरिजको फाईनल पोखरामा आयोजना गर्ने तयारी गरिएको छ । यद्यपी पोखरामा एशियन ट्रायथोलन च्याम्पियन आयोजना गर्ने संघले जनाएको छ । एशियन ट्रायथोलनको लागि भने मिति तय भईसकेको छैन् ।