पुम्दीको उल्लेरीमा सेभेन ए साईड फुटबल प्रतियोगिता

पोखरा-पोखरा–२२ पुम्दीभुम्दीको उल्लेरीमा पहिलो पटक सेभेन ए साईड फुटबल प्रतियोगिता आयोजना हुदैं छ । गाम्रीण पर्यटन प्रवद्र्धन गर्ने उद्देश्यसहित उल्लेरी युवा क्लबले गाउँमै पहिलो पटक सेभेन ए साईड फुटबल प्रतियोगिता आयोजना गर्ने तयारी गरेको हो ।

१६ सय मिटरको उचाईमा रहेको उल्लेरीस्थित खेल मैदानमा यही मंसिर २२ गतेदेखि २५ गतेसम्म फुटबल प्रतियोगिता सञ्चालन हुने प्रतियोगिताका संयोजक यामबहादुर गुरुङले जानकारी दिए । क्लबका अध्यक्ष जीवन गुरुङका अनुसार चारदिने फुटबल प्रतियोगिताले कोरोनाले थलिएको ग्रामीण पर्यटन प्रवद्र्धनमा टेवा पुग्ने विश्वास छ । गाँउमा ५ घर होम स्टे छन् ।

राष्ट्रिय खेलकुद परिषद तथा पोखरा महानगरपालिकाको आर्थिक सहयोगमा सेभेन ए साईड फुटबल मैदान निर्माण गरेपछि क्लबले सेभेन ए साईड फुटबलको जमर्को गरेको हो । प्रतियोगिताका कास्की र छिमेकी जिल्लाका गरी २२ टोलीको सहभागिता रहने अनुमान गरिएको छ । उल्लेरी गाँउ स्याङजासँग जोडिएको छ ।

प्रतियोगितामा विजेताले ५० हजार रुपैयाँ प्राप्त गर्ने छन् । उपविजेताले २५ हजार र तेस्रो हुने टिमले नगद १० हजार रुपैयाँ प्राप्त गर्ने छ । उत्कृष्ट खेलाडी र उत्कृष्ट गोलकिपरले ट्रफी पाउने छ । प्रतियोगिताको लागि विदेशमा रहेको आफन्त र साथीभाइको सहयोग रहने विश्वास गर्दै संयोजक गुरुङले बचत रकम खेलकुद मैदान निर्माणमै खर्च गरिने बताए ।