प्रदेशको भत्ताले र्याकेटको तार आउँदैन

पोखरा-‘प्रदेश खेलकुद परिषदले दिएको भत्ताले र्याकेटको तार(स्ट्रिङ) पनि आउँदैन् । तार चुँडेपछि बनाउन पनि नपुग्ने भत्ता लिएर प्रदेशको लागि खेल्नुपर्ने बाध्यता छ ।’ टेनिस खेलाडी प्रदीप खड्काले भने–‘भत्ता भन्दा पनि प्रदेशको नामको लागि खेल्दै छौं ।’ उनी टेनिसका नेपालका शीर्ष बरियताका खेलाडी समेत हुन् । उनका अनुसार र्याकेटको तार फेर्न एकहजार २ सय भन्दा बढी लाग्छ ।

उनले खेलाडीलाई दिईने सुविधामा सम्बन्धित निकायले ध्यान दिन जरुरी रहेको उल्लेख गरे । खेलाडी विना खेलकुद निकायको अर्थ हुदैन् । तर खेलाडीलाई सेवा सुविधा दिने तर्फ सरोकार निकाय मौन रहेको छ । भत्ताले र्याकेटको तार चुँड्दा बनाउन नपुग्ने भत्तामै खेलाडी रमाउनुपर्ने बाध्यता छ । आफैं सामानले प्रतियोतिगा खेल्नुपर्छ । सामान समेत दिईएको छैन् ।

प्रतियोगिता नजिकिदैं गर्दा नियमित प्रशिक्षणमा छन् । निरज थापाले नवौं राष्ट्रिय खेलकुद प्रतियोगितामा सहभागि खेलाडीहरुलाई प्रशिक्षण दिईरहेका छन् । सातौं राष्ट्रिय खेलकुद प्रतियोगिता अन्तर्गत टेनिस पोखरामै आयोजना गरिएको थियो । टेनिस प्रतियोगिताको लागि कास्की जिल्ला टेनिस संघले चार वटा कोर्टलाई मर्मत सम्भार शुरु गरेको छ । लगभग मर्मत सम्भार सकिएको छ । सुर्की हालेर रोलरले पेल्ने काम भईसकेको छ ।

‘पोखरामा आयोजना हुने नवौं राष्ट्रिय खेलकुदमा कोर्ट मर्मत गर्न समेत चासो दिएनन् । आयोजक राखेप हुदाँ मर्मत पनि राखेपले नै गर्छ । संघलाई जिम्मेवारी पनि नदिने । आफुले पनि नगर्ने । बजेट पनि नदिने प्रवृत्तिले समस्या बनाईदियो ।’ संघका अध्यक्ष लोकबहादुर गुरुङले भने–‘उपभोत्ता समिति गठन गरेर काम गर्यौं । बजेट कहिले आउँछ थाहा छैन् ।’ राष्ट्रिय खेलकुद प्रतियोगिताको लागि राखेपले नै चासो दिनुपर्ने भन्दै हामी आफैं कोर्ट मर्मत गर्न तयार रहदाँ बजेट दिन आनाकानी गरेको उनको गुनासो थियो ।