टेनिसका दीप प्रदिप

- खेलाडी न्युज, पोखरा


     खेलाडी न्युज    
     कार्तिक ८ गते २०७९ मा प्रकाशित


पोखरा-सफलता पाउन धेरै मेहनत गर्नुपर्छ । विना संघर्ष प्रतिफल पनि आउँदैन् । प्रतिफलको लागि आफ्नो लगाव उत्तिकै जरुरी छ । त्यति मेहनतको प्रतिफल पाएका हुन प्रदीप खड्काले । संघर्षका पाईला चाल्दै हरदम कोर्टमा र्याकेट बोकेर कोर्ट चाहर्ने प्रदीपले नवौं राष्ट्रिय खेलकुद प्रतियोगिता तीन स्वर्ण जिते । उनी मात्रै एक्ला खेलाडी हुन जसले तीन वटा स्वर्ण पदक जितेको ।

उनले व्यक्तिगत विधामा स्वर्ण पदक जिते । प्रतिस्पर्धी थिए गैरआवासिय नेपाली खेलाडी आरभ हाडा । हाडा कुनैबेला जुनियरका शीर्ष बरियताका खेलाडी थिए । प्रदीपले दोस्रो स्वर्ण टिम इभेण्टमा जिते । तेस्रो स्वर्ण उनले मेन्स डबल्समा जिते । उनको जोडी थिए अनिल साई । साई कुनैपनि कास्कीका शीर्ष बरियताका खेलाडी हुन् ।

खड्कालाई विभागीय क्लबबाट टेनिस खेल्न प्रस्ताव नआएको होईन् । तर उनले त्यो प्रस्तावलाई थाँती राखे । रोजे आफनै प्रदेश । भर्खरै टेनिसमा आफनो शीर्ष बरियताको छाप छोड्न शुरु गरेका खड्कालाई चुनौति दिने कमै देखिए । टेनिस आफैंमा शान्त र शालिन खेल हो । हतासिँदा खेल आफनो हातबाट फुत्किन्छ । उनले राम्ररी बुझेका छन् ।

त्यसैले त उनी एकल प्रतिस्पर्धाको फाईनलमा हतास नभई ०-३ ले डाउन भएको पहिलो र दोस्रो सेटमा कमब्याक गर्दै स्वर्णको हकदार बने । पहिलो सेट टाईब्रेकरमा लिदाँ दोस्रो सेट ६-३ ले आफनो पक्षमा पारेर ऐतिहासिक स्वर्ण थपे । जुन गण्डकी प्रदेशको नाममा स्वर्ण लेखिदाँ उनले नवौंमा स्वर्णको ह्याट्रिक पुरा गरेका हुन् । पोखराको पर्यास्ङबाट बल ब्वाईबाट टेनिसमा उठेका प्रदीप अहिले टेनिसको दीप बनेर उज्यालो छरेका छन् ।