गल्फ मन्थ्ली मेडल, गौचनलाई उपाधि

पोखरा-नवौं राष्ट्रिय खेलकुद प्रतियोगिता पछि पोखराको छिनेडाडाँस्थित हिमालयन गल्फ कोर्षमा आयोजित मन्थ्ली मेडलको उपाधि क्याप्टेन राजेन्द्र गौचनले जितेका छन् ।

६९ पारको हिमालयन कोर्षमा भएको प्रतिस्पर्धा फूल ह्याण्डीक्यापमा प्रतिस्पर्धा गराईएको थियो । प्रतिस्पर्धामा गौचनले बलराम थापालाई पराजित गर्दै उपाधि जितेका हुन् । उनले ५ ओभर ७४ स्कोरको कार्ड बनाउँदै उपाधि जित्दा थापा भने काउण्ट व्याकमा पराजित हुन पुगे । समान ७४को कार्ड बनाएपनि थापा काउण्ट व्याकमा पछि परेका हुन् ।

ग्रस तर्फको पुरस्कार भने लेफ्टिनेन्ट कर्णेल याम रानाले जिते । पाहुना खेलाडीको पुरस्कार खोपजंग गुरुङले प्राप्त गरे । उनले ६९ को लेभलपार खेले । त्यस्तै मेजर गुप्तमान गुरुङ भने ८२ को कार्ड बनाउँदै उपविजेतामा चित्त बुझाए ।

प्रतियोगिताको लागि बेलायती सेनामा कार्यरत तथा रिटार्यड खेलाडीहरु पाहुना(गेष्ट)को रुपमा छुट्टै प्रतिस्पर्धा गरेका थिए । मन्थ्ली मेडलमा २८ जना गल्फरले प्रतिस्पर्धा गरेका थिए । विजेता खेलाडीहरुलाई कास्की जिल्ला गल्फ संघका उपाध्यक्ष ज्ञानकाजी गुरुङले पुरस्कार बाँडे ।