फेन्सिङमा गण्डकीलाई पहिलो पदक

पोखरा-नवौं राष्ट्रिय खेलकुद अन्तर्गत फेन्सिङमा छ स्वर्ण पदकको छिनोफानो भईसकेको छ । सोमबार तीन स्वर्ण पदकको छिनोफानो हुदाँ मंगलबार थप तीन स्वर्णको प्रतिस्पर्धा टुंगिएको छ ।

पोखरा रंगशालास्थित व्याडमिन्टन कोर्टमा भएको प्रतिस्पर्धामा मंगलबार फेन्सिङ पुरुष व्यक्तिगत साबर तर्फ सशस्त्र प्रहरी बलका राजेन्द्र गजुरेलले स्वर्ण पदक जितेका छन् । उनले सातौंमा टिम इभेन्टमा रजत, ८ औ राष्ट्रिय प्रतियोगितामा टिम र एकल दुईमा रजत पदक जितेका थिए । साबरमा नेपाल आर्मीका उपेन्द्रबहादुर शाहीले रजत पदकमा चित्त बुझाएका थिए । विभागीय प्रतिस्पर्धामा गजुरेलले बाजी मारेका हुन् । त्यसै गरी आर्मीकै रघुवीर चन्द र सशस्त्र प्रहरी बलका खेमराज खत्रीले कास्य पदकमा चित्त बुझाए ।

महिला तर्फको फोयल प्रतिस्पर्धामा आर्मीकी रमाकुमारी सिंहले स्वर्ण पदक जितिन् । सशस्त्र प्रहरी बलकी मनिषा राईले रजत र सशस्त्र प्रहरी बलकै मन्दीरा थाप र अनिता अधिकारीले कास्य पदक जिते । पुरुष ईपी तर्फको प्रतिस्पर्धामा बागमती प्रदेशका ओमकार सिंहले स्वर्ण पदक जिते । उनले विभागीय खेलाडीलाई पाखा लगाउँदै स्वर्ण जितेका हुन् ।

नेपाली सेनाका राम थापाले रजत पदकमा चित्त बुझाए । सेनाका मीन कार्की र गण्डकी प्रदेशका विजय अधिकारीले कास्य पदक जिते । अधिकारी नवौं राष्ट्रिय खेलकुद प्रतियोगितामा गण्डकी प्रदेशकै पहिलो पदक विजेता खेलाडी बन्न सफल भए । फेन्सिङको व्यक्तिगत तर्फ पुरुष साबर, पुरुष ईपी र महिला तर्फको फोयल खेलको निर्णय भएको हो ।