सशस्त्र प्रहरी फाईनल र पुलिस फाईनलमा

पोखरा–महिला क्रिकेटको उपाधिको लागि नेपाल पुलिस क्लबले सशस्त्र प्रहरी बलसँग उपाधि प्रतिस्पर्धा पक्का गरेको छ । डेब्यु प्रतियोगितामा उपाधि जित्ने लक्ष्य सहित टोली बनाएको पुलिसले मंगलबार पोखरा रंगशाला क्रिकेट मैदानमा उपाधिको लागि सशस्त्र प्रहरी बलसँग खेल्ने छ ।
ज्योति पाण्डको अविजित ६९ रनको ठोस इनिङ्समा सशस्त्र प्रहरी बलले लुम्बिनी प्रदेशलाई ६७ रनले पराजित गर्दै फाईनल प्रवेश गरेको छ । १३० रनको लक्ष्य पछ्याएको लुम्बिनी प्रदेश ६२ रनमा समेटियो ।

नवौं राष्ट्रिय खेलकुद प्रतियोगिता अन्तर्गत सोमबार पोखरा रंगशालामा भएको पहिलो सेमिफाईनलमा टस हारेको सशस्त्रले १२९ रनको योगफल तयार पार्यो । पाण्डेले ओपनिङ गर्दै ६१ बल खेल्दै ६९ रनमा अविजित रहिन् । उनले ७ चौका हिर्काईन् । सशस्त्र प्रहरीले २० रनको योगफल बनाउँदा पहिलो विकेटको रुपमा सीता राना मगरलाई गुमाएको थियो । मगरले ११ रन जोडिन । दोस्रो विकेटको रुपमा इन्दु बर्मा आउट भईन् । उनले ६ रन बनाईन् । ममता चौधरीले १६ रनमा आउट हुदाँ ओपनर पाण्डे र रोमा थापाले ५५ रनको साझेदारी निभाएका थिए । रोमाले १२ रनमा अविजित रहिन् । कृतिका मरासिनीले दुई विकेट लिईन् ।

१३० रनको लक्ष्य पछ्याएको लुम्बिनी प्रदेश ६२ रनमा समेटिएको छ । पहिलो विकेट १८ रनमा गुमाएको लुम्बिनीका लागि सुष्मिता बजगाँईले सर्वाधिक १२ रन जोडिन् । उनले २३ बल खेल्दै १ चौका प्रहार गरिन् । अन्य व्याटरले दोहोरो अंकको रन बनाउनबाट चुकेका थिए । लक्ष्मी चौधरीको व्याटबा ५ रन आउँदा आस्मा पुलामी मगरले ६ रन बनाईन् । २४ बल खेल्ने क्रममा १ चौका हिर्काईन् । मधु डिसीले ५ रन बनाउँदा ७ बल खेल्दै १ चौका स्कोर बोर्डमा लेखिएको थियो । नेरी थापाले ४ ओभरमा ७ रन खर्चिदै ४ विकेट लिईन् ।

दोस्रो खेलमा टस हारेर व्याटिङ गरेको नेपाल पुलिस क्लबले बागमती प्रदेशलाई ३६ रनले पराजित गर्दै फाईनल प्रवेश गरेको छ । टस हारेर व्याटिङ गरेको नेपाल पुलिसले ४ विकेटको क्षतिमा १२३ रनको योगफल तयार पारेको छ । ओपनर काजल श्रेष्ठले ५१बल खेल्दै ५ चौकासहित ४६ रनको योगदान दिईन् । कविता कुँवरले २६ रन जोडिन । पहिलो विकेटको लागि नेपाल पुलिसले ७० रनको महत्वपूर्ण साझेदारी निभाए । मध्यक्रमका व्याटरको रन उल्लेल्य रहेन् । कप्तान रुविना क्षत्री र कविता जैसी अविजित रहने क्रममा १७ र १५ रन जोडिन् । कविताले ९ बल खेल्दै १ छक्का हिकाईन् । बागमतीकी अस्मिना कर्माचार्य, खुशी डंगोल र सुमन खतिवडाले १÷१ विकेट लिए ।

१२४ रनको लक्ष्य पछ्याएको बागमती प्रदेश ८७ रनमा समेटिएको छ । पहिलो विकेट पहिलो ओभरमै गुमाएको बागमतीले ओपनरलाई सस्तैमा गुमाएको थियो । सुमन खतिवडाले २३ रन जोड्ने क्रममा २३ बल नै खेलिन् । ३ चौका उनको व्याटबाट निस्कियो । अस्मिना कर्माचार्यले ३५ बलमा १८ रन बनाईन् । आरती भण्डारीले अविजित ११ रन जोडिन् । कविता कुँवरले ४ ओभरमा ६ रन दिएर ३ विकेट लिईन् । ईश्वरी विष्टले २ विकेट लिईन् ।