गोरखा हिल युके क्याडिज गल्फको पुरस्कार सुनारलाई

पोखरा-गोरखा हिल युकेको मुख्य प्रायोजनामा आईतबार हिमालयन गल्फ कोर्षमा आयोजित क्याडिज गल्फ प्रतियोगिताको उपाधि सुशिल सुनारले जितेका छन् । १८ होलको पार ६९ को कोर्षमा सुनारले चार ओभर ७३ को स्कोरसहित च्याम्पियन बनेका हुन् । उनले नगद पुरस्कार ५ हजार प्राप्त गरे । एक स्ट्रोकले पछि परेका समीर गुरुङ दोस्रो स्थानमा चित्त बुझाए । उनले तीन हजार नगद प्राप्त गरे । सन्दीप सुनार भने ७९ स्कोरसहित तेस्रो स्थानमा रहे । उनले दुईहजार रुपैयाँ पुरस्कार प्राप्त गरे ।

समूह बी अन्तर्गतको प्रतिस्पर्धामा अमृत परियारले ८४ को स्कोर गर्दै नगद ५ हजार राशीको पुरस्कार थाप्न सफल भए । गंगाराम परियारले ८६ स्कोरसहित दोस्रो र रोहित विकले भने १०३ स्कोरसहित तेस्रो स्थानमा चित्त बुझाए ।

जुनियर तर्फको प्रतिस्पर्धामा राहुल परियार, सुमित विक र अश्विन नेपाली क्रमश प्रथम द्धितीय र तृतीय भए । उनीहरुले नगद ४ हजार, दुई हजार पाँचसय र एक हजार पाँचसय रुपैयाँ प्राप्त गरे । महिला तर्फको प्रतिस्पर्धामा अस्मिता विक विजेता भईन । अन्जना परियार दोस्रो स्थानमा रहिन् । समीर गुरुङ लङगेष्ट ड्राईभको पुरस्कार प्राप्त गरे भने सुशिल विकले क्लोजेष्ट टु दि पीनको पुरस्कार हात पारे ।

विजेता क्याडी गल्फरलाई मुख्य प्रायोजक गोरखा हिल युकेका चन्द्र गुरुङ, श्रीमती शान्ता गुरुङ, सहप्रायोजक श्रीमती गीता गुरुङ, दिपक मगर, सन्तोषकुमार राई र दिल सोमाई लगायतले पुरस्कार प्रदान गरेका थिए । ३० जना क्याडीले प्रतिस्पर्धा गरेका थिए । सहभागि अन्य १९ क्याडीलाई सान्त्वना पुरस्कार स्वरुप नगद एक हजार रुपैयाँ प्रदान गरिएको थियो ।