लोमान्थाङको खेलग्राममा बास्केटबल र भलिबल कोर्ट तयार गरिदैं

मुस्ताङको लोमान्थाङ गाँउपालिकामा निर्माणाधिन खेलग्राममा बन्दै गरेको बास्केटबल कोर्ट ।

पोखरा-एक वर्ष अघि हिमालपारीको जिल्ला मुस्ताङको उपल्लो क्षेत्र लोमान्थाङमा खेलग्राम निर्माण शुरु गरिएको थियो । लोमान्थाङ गाउँपालिकाको किमलिङ–६ मा फुटबल मैदानसहितको खेलकुद पूर्वाधार निर्माण शुरु गरिएको छ । फुटबल मैदान सम्याएर छोडिएको छ । गतवर्ष संघीय सरकारले उपलब्ध गराएको १ करोड रुपैयाँबाट फुटबल मैदान निर्माण शुरु गरिएको हो । नयाँ आर्थिक वर्षसँगै काम अघि बढ्ने विश्वास गरिएको छ ।

किमलिङ–६ मा निर्माणाधिन खेलग्राम ३ सय ८ मिटर लम्बाई र १२० मिटर चौडाईको छ । मैदानको पूर्व तर्फ १ सय २० मिटर लम्बाईको पर्खाल लगाईको छ । पर्खाल ५ मिटर अग्लो र सवा दुई मिटर चौडाईको छ । प्रतिवेदन अनुसार मैदानको चारैतिर बालुवा, ढुंगा, ग्राभेल छ । ‘एक करोड रुपैयाँले पर्खाल निर्माण र जमिन सम्याउने काममा खर्च गरिएको छ ।’ गण्डकी प्रदेश सदस्य इन्द्रधारा विष्टले बताए । उनका अनुसार फुटबल मैदान भन्दा तल बास्केटबल कोर्ट, भलिबल कोर्ट तयार गरिदैं छ । ‘भलिबल र बास्केटबल कोर्टको ढलानको काम भईरहेको छ ।’ विष्टको भनाई थियो ।

चालु आर्थिक वर्षमा प्रदेश सरकारबाट २० लाख रुपैयाँ छुट्टिएको थियो । संघीय सरकारबाट २५ लाख रुपैयाँ विनियोजन भएको प्रदेश सदस्य विष्टले सुनाए । ‘प्रदेशको २० लाख र संघीय सरकारको २५ लाख रुपैयाँबाट काम अघि बढाइएको छ ।’ उनको भनाई थियो । प्रदेश र संघको बजेटबाट बास्केटबल र भलिबल कोर्ट ढलान कार्य गरिएको उनले बताए । बजेटबाटै केही ठाँउमा रिटनेङि पर्खाल उठाइएको छ ।

डिपिआर अनुसार फुटबल मैदान, प्यारापिट, बास्केटबल कोर्ट, भलिबल कोर्ट, भिआईपी भवन, चेन्जिङ रुमसहित पार्किङ एवं शौचालय निर्माण गरिने छ । दुईहजार दर्शक क्षमताको प्यारापिट निर्माण हुने प्रतिवेदनमा उल्लेख छ ।

खेलग्राम निर्माणपछि ‘हाईअल्टिच्युड टे«निङ सेन्टर’ हुने विश्वास मुस्ताङबासीले गरेका छन् । मुस्ताङकै जोमसोममा भने ८ करोडको लागतमा बहुउद्देश्यीय कभर्ड हल निर्माण कार्य शुरु गरिएको छ ।