चितवनको जित, पोखरालाई प्ले अफको चिन्ता

पोखरा-पोखरा राईनोजले दिएको सामान्य लक्ष्यलाई चितवन टाईगर्सले सहज पछ्याउँदै जित निकाल्दा पोखरा राईनोजलाई प्ले अफ खेल्ने अभियानमा धक्का लागेको छ । एभरेष्ट प्रिमियर लिग टी–२० क्रिकेट प्रतियोगितामा पोखराले चितवलाई केवल १ सय २३ रनको झिनो लक्ष्य प्रस्तुत गरेको थियो । लक्ष्यलाई चितवन टाइगर्सले १ विकेटको क्षतिमा पुरा गर्दै प्ले अफलाई बलियो बनाईराखेको छ ।

टस जितेर ब्याटिङ्ग गरेको पोखरा राइनोजले पुरा २० ओभरमा ७ विकेट गुमाएर १ सय २३ रनको सामान्य योगफल बनाएको थियो । चितवनको जितमा व्याटर मोहम्मद शेहजादले अविजित ६३ तथा भीम सार्कीले अविजित ५४ रन जोडेपछि पोखराले दिएको लक्ष्यलाई पुरा गर्दै फराकिलो जित दर्ता गर्यो । १ सय २४ रन पछ्याएको चितवनले १६.४ ओभरमा पुरा गरेको थियो ।

पोखराको व्याटिङ्गमा बिबेक कुमार यादवले अर्धशतक पुरा गरेपनि अन्य व्याटर भने चल्नै सकेनन् । उनले अविजित खेल्ने क्रममा ५३ रनको महत्वपूर्ण योगदान गरे । पोखराका लागि असेला गुणरत्नेले २५ तथा रिचार्ड लेभीले २० रन बनाएका थिए । चितवनका बलरहरु साहब आलमले २, कमलसिंह ऐरीले २ तथा सोमपाल कामीले १ विकेट लिए ।

जितसंगै चितवन लिगको शीर्षस्थानमा उक्लिएको छ । उसले तीन खेलमा तीनवटै जित हाँसिल गर्दै अंक तालिकामा ६ अंक जोडन सफल भएको छ । लिगमा १ जित र एक बराबरीसंगै ३ अंक जोडेको राइनोजले भोलि भैरहवा ग्लाडिएटर्सको सामना गर्ने छ ।