घिमिरे महानगर स्क्वास च्याम्पियन

पोखरा-पोखरा रंगशालामा आयोजित स्क्वास प्रतियोगितामा सन्तोष घिमिरे च्याम्पियन बनेका छन् । उनले शनिबार पोखरा रंगशाला स्क्वास हलमा आयोजित फाईनल प्रतिस्पर्धामा घिमिरेले रबिन्द्र बाटाजूलाई ३–० को सोझो सेटमा पराजित गर्दै च्याम्पियन बनेका हुन् ।

पोखरा महानगरपालिका खेलकुद विकास समितिको आयोजनामा तथा स्क्वास र्याकेट एशोसियसनको सहयोगमा आयोजित प्रतियोगिताको फाईनलमा घिमिरेले बाटाजूलाई ११–३, ११–४ र तेस्रो सेट ११–७ मा पराजित गर्दै च्याम्पियन बनेका हुन् ।

विजेता खेलाडीहरुलाई गण्डकी प्रदेश सरकारका निर्वतमान अर्थमन्त्री किरण गुरुङले पदक तथा प्रमाणपत्र प्रदान गरेका थिए । ओलम्पिक दिवसको अवसरमा आयोजित प्रतियोगितामा ३५ जना खेलाडीहरुले प्रतिस्पर्धा गरेका थिए ।

पोखरा रंगशालाभित्र स्क्वासको हल बनाउन तत्कालिन अर्थमन्त्री गुरुङले आर्थिक सहयोग जुटाएका थिए । नवौं राष्ट्रिय खेलकुद प्रतियोगितालाई लक्षित गर्दै स्क्वास संघ कास्कीले थप दुईवटा कोर्ट निर्माणको तयारी गरेको छ ।