आर्मीको जितमा भरत नायक

पोखरा-आहा रारा पोखरा गोल्डकपमा नवप्रवेशी क्लब राईजिङ स्टार क्लब नवलपरासी त्रिभुवन आर्मीसँग पराजित हुदैं पोखरामा केवल अनुभव साटेर फर्किएको छ । पहिलो हाफको २७ औं मिनेटमा आर्मीका कप्तान भरत खवासले निर्णायक गोल गर्दै गोल्डकपको क्र्वाटरफाईनल प्रवेश गर्दा नवप्रवेश टोलीको पोखरा यात्रा सुखद हुन सकेन् ।

सहारा क्लबको आयोजना पोखरा रंगशालामा भईरहेको २३ औं संस्करणको आहा रारा पोखरा गोल्डकपको बुधबार भएको प्रतिस्पर्धामा आर्मीले राईजिङमाथि प्रतिस्पर्धात्मक जित आत्मसात गर्यो । कमल थापाले मिलाईदिएको पासलाई भरत खवासको उत्कृष्ट हेडर गोलमा परिणत भएपछि आर्मीलाई जितको आधार तयार भयो । यद्यपी आर्मीले भने राईजिङलाई सोचेजस्तो दबाव बनाई थप गोलको अवसर भने सृजना गर्न सकेन् ।

विभागीय टोली आर्मी पोखराको मैदानबाट उपाधि उचाल्ने सम्भावित टोलीमा हेरिदैं आएको छ । तर उपाधिमा नाम भने लेखाउन सकेको छैन् । अधिकांश नयाँ खेलाडीलाई टोलीमा उतार्दा आर्मीले प्रभावकारी खेल पस्कन सकेन् । दर्शकको समर्थन मोसफलको टोली राईजिङलाई रहेपनि समर्थनलाई जितमा परिणत गर्न असमर्थ बन्यो ।

पहिलो हाफको अन्तिम समयमा दिनेश हेमजनले दिएको क्रसपासलाई अग्ला कदका जिलेस्पीजंग कार्की गतिलो हेड प्रहार गर्न सकेनन् । खेलको प्लेयर अफ दि म्याच आर्मीका भरत खवास बने । हिमश्री फुड्सको मुख्य प्रायोजन रहेको प्रतियोगिताको विहीबारको खेल मछिन्द्र क्लबले जावलाखेल युथ क्लबसँग खेल्ने छ ।