फुटबल संघद्वारा अभिभावकहरुलाई पोषण सम्बन्धी एकदिने कार्यशाला

पोखरा-कास्की जिल्ला फुटबल संघले उमेर समूहको फुटबल एकेडेमी शुरु गरेको वर्षदिनको समय वित्यो । एकेडेमीमा उमेर समूहको बालकहरुको उपस्थिति बाक्लिदैं गएको छ ।

एकेडेमीमा यु ८ देखि यु १८सम्मका झण्डै डेढसय खेलाडीहरुले नियमित प्रशिक्षण लिदैं आएका छन् । उनीहरुलाई पोखरा रगशाला बैकल्पिक फुटबल मैदानमा प्रशिक्षण संघले गराउँदै आएको छ । फुटबलको ग्रास रुट बलियो बनाउने अभियानलाई मूर्त दिन कास्की जिल्ला फुटबल संघले दैनिक प्रशिक्षण गराउँदै आएको छ ।

संघमा आवद्ध क्लबहरुले समेत प्रशिक्षण गराउँदै आएका छन् । प्रशिक्षण गराउने क्लबलाई संघले फुटबल सहयोग उपलब्ध गराउँदै आएको छ । यसैबीच संघले प्रशिक्षण गराउँदै आएको एकेडेमीका बालकसहित अभिभावकलाई पोषण सम्बन्धी प्रशिक्षण दिएको छ । एक दिने कार्यशालामा ५० जनाको उपस्थिति रहेको थियो ।

कास्की जिल्ला फुटबल संघका उपाध्यक्ष एवं एकेडेमीका संयोजक समेत रहेका नरेन्द्रजंग गुरुङका अनुसार एकेडेमीमा केवल फुटबल प्रशिक्षण मात्रै नभई आवश्यक पोषण सम्बन्धी समेत ज्ञान हुनुपर्ने भएकोले अभिभावकलाई पोषण सम्बन्धी जानकारी दिइएको छ । शनिबार अभिभावकसहित एकेडेमीका खेलाडीहरुको उपस्थितिमा न्युट्रिसनिष्ट डा. केशव भट्टराईले बढ्दो उमेरसँगै बालबालिकालाई चाहिने आवश्यक पोषणको बारेमा जानकारी गराएका थिए ।