श्रीलंकन क्लबमाथि दोस्रो जित

काठमाडौं मार्च दोस्रो साताबाट हुने विश्व क्रिकेट लिग टु अन्तर्गतको क्रिकोणात्मक शृंखलाको अभ्यासका लागि श्रीलंका भ्रमणमा रहेको नेपाली क्रिकेट टोलीले जित यात्रालाई दोस्रो खेलपनि मंगलबार निरन्तरता दिएको छ ।

नेपालले मंगलबार नेभीलाई ८२ रनले पराजित गरेको हो । सोमबार पहिलो खेलमा नेपालले नेभीलाइ एक सय ११ रनले पराजित गरेको थियो । सो खेलमा नेपालका लागि दिपेन्द्रले सर्वाधक ४३ रनको योगदान गरेका थिए ।

नेपालले प्रस्तुत गरेको एक सय ९७ रनको लक्ष्य पछ्याएको नेभी ३०.५ ओभरमा १ सय ५ रनमा सीमित भयो । नेभीले रन खाता नखोल्दै ओपनर मायान्था वारुनालाई पहिलो विकेटको रूपमा गुमायो ।दोस्रो विकेटका लागि डायस र नुवान्था केसराले ४९ रनको साझेदारी सहित नेभीको इनिङ सम्हाल्ने संकेत गरेका थिए ।

तर १४आंैं ओभरको पाँचौ बलमा नुवान्था पवेलिन फर्किएपछि भने नेभीको इनिङ धरमराएको थियो । नुवान्थाले ४९ बलमा ५ चौका मद्दतमा ३४ रनको योगदान गरे । त्यस्तै डायसले १४ रन बनाए । त्यसपछि ब्याटिङका लागि आएका गुरुसिंंहाले ४१ बलमा १ चौका र २ छक्का मद्दतमा २४ रन जोडे । ४९–२ को स्थितीमा रहेको नेभीले थप ६६ रन जोड्दा बाँकी ८ विकेट गुमाएको थियो ।

नेपालका लागि पवन सराफले ५ ओभरमा २६ रन खर्चेर ४ विकेट लिए । त्यस्तै दिपेन्द्रले २ तथा कप्तान सन्दिप लामिछाने, कुशल भुर्तेल र विक्रम सोबले समान १ विकेट लिए ।

यसअघि टस हारेर ब्याटिङका लागि नेपाल ४३.४ ओभरमा १ सय ९६ रनमा सीमित भएको थियो । ३ रन जोड्दा ओपनर ज्ञानेन्द्र मल्ललाई गुमाएको नेपालले थप ५ रन जोड्दा अर्को ओपनर कुशल भुर्तेललाई पनि गुमायो ।२८ रन जोड्दा रोहित कुमार पौडेललाई तेस्रो विकेटको रुपमा गुमाएको नेपाल थप ४ रन जोड्दा विनोद भण्डारीलाई पनि गुमाएपछि ३२–४ को कठिन स्थितीमा पुगेको थियो ।

पाँचौ विकेटका लागि पवनले ४८ रनको साझेदारी गरेका दिपेन्द्रले छैटौ विकेटका लागि भिम सार्कीसँग ५७ रनको साझेदारी गर्दै नेपालको इनिङ उकासेका थिए ।

दिपेन्द्रले ७९ बलमा ५ चौका र १ छक्का मद्दतमा ६५ रनको योगदान गर्दा भिमले४२ बलमा १ चौका मद्दतमा ३० रन जोडे । त्यस्तै विवेक यादवले २६ र पवनले २२ रन बनाए ।