मधेशद्वारा आर्मीलाई जितको लागि १३६ रनको लक्ष्य

पोखरा-मधेश प्रदेशले त्रिभुवन आर्मीलाई १३६ रनको लक्ष्य दिएको छ । टस जितेर व्याटिङ गरेको मधेशको शुरुवात उत्कृष्ट हुन सकेन् । । सातौं नम्बरमा आएका विशाल पटेलले इनिङ सम्हाल्दै अविजित ४९ रनको योगदानमा मधेशले ८ विकेट गुमाउँदै १३५ रन बनायो । उनले ३२ बल खेल्दै तीन चौका र तीन छक्का हिर्काए ।

केपी ओली टी–२० कप क्रिकेट प्रतियोगिताको शुक्रबार पोखरा रंगशाला क्रिकेट मैदानमा भएको फाईनल खेलमा टस जितेको मधेशले पावर प्लेमा ४६ रन बनाउँदा दुई विकेट गुमाएको थियो । १७ रन जोड्ने क्रममा पहिलो विकेट गुमाएको मधेशले दोस्रो विकेट पनि सस्तैमा गुमायो । अनिल साहलाई तिब्रगतिका बलर सोमपाल कामीले विवेक यादवको हातबाट क्याच गराए । दोस्रो विकेटको रुपमा हरिशंकर साहलाई गुमाएको थियो । कप्तान हरिशंकरले २१ बल खेल्दै २७ रन बनाए । ३ चौका र २ छक्का उनको इनिङमा रह्यो ।

इमरान शेखलाई सातौं ओभरको दोस्रो बलमा गुमाएपछि मधेश दबावमा पर्यो । शेख पनि ८ रन आउट भए । साहब आलमको बलमा विकेट किपर विनोद भण्डारीले शेखलाई स्टम्प आउट गरिदिए । पाँचौ नम्बरमा आएका मायान यादवलाई आलमले नै बोल्ड गरेपछि मधेश ९ ओभरको समाप्तीमा ५२÷४ को स्थितिमा रह्यो । दशौंओभरमा मधेशले केवल तीन मात्रै जोड्यो ।

११ औं ओभरको तेस्रो बलमा आलमले पवन सर्राफलाई ९ रनमा पभेलियनको बाटो देखाए । १४ बल खेल्ने क्रममा सर्राफ बोल्ड भए । त्यस ओभरमा आलमले केवल एक रन खर्चिएर एक विकेट लिए । उनले तीन ओभर बलिङमा केवल ५ रन खर्चिएर ३ विकेट लिए । मधेशका व्याटरको महत्वपूर्ण साझेदारी बन्ने सकेन् । बसिर अहेमदको बलमा हिमांशु दत्त १४ रनमा बोल्ड भए । १८ औं ओभरमा विवेक यादवले पहिलो र दोस्रो बलमा विकेट लिएपछि मधेशको स्कोर मध्यम बन्न पुग्यो । एकै ओभरमा यादवले विशाल सुस्लिङ र रुपेश सिंहको विकेट लिए । विवेक र साहब आलमको नाममा समान ३ विकेट लेखियो ।