सर्वाधिक पुरस्कार राशीको सेभेन ए साईड फुटबल बैशाख ६ गतेदेखि

- खेलाडी न्युज, पोखरा


     खेलाडी न्युज    
     चैत्र ३० गते २०७४ मा प्रकाशित


highest prize money 7 a side tournamet

पोखरा, (खेलाडी न्युज)-एक वर्षभित्रमा पोखरामा सेभेन ए साईड फुटबल प्रतियोगिता दुईदर्जन भन्दा बढी हुन्छन् । वर्षेनी आयोजना हुने फुटबलले खेलाडीलाई व्यस्तता बनाईदिएको छ । प्रतियोगितालाई प्रतिस्पर्धात्मक बनाउने धुनमा पुरस्कार राशीमा समेत बृद्धि हुदैं आएको छ । आगामी बैशाख पहिलो साता पोखराकै सर्वाधिक पुरस्कार राशीको सेभेन ए साईड फुटबल प्रतियोगिता हुदैं छ ।

बौद्ध शान्ति क्लव, पोेखरा–१०, रामघाटको आयोजनामा आगामी बैशाख ६ गतेदेखि अम्मरसिंह खेल मैदानमा सर्वाधिक पुरस्कार राशीको प्रतियोगिता खेलाउने छ । ‘युवाहरुलाई खेलकुदतर्फ आकर्षित गरौं, स्वास्थ्य र अनुशासित समाज निर्माण गरौं’ भन्ने मुल नाराका साथ हुन लागेको प्रतियोगिताको उपाधी विजेता टिमले हाल सम्मकै उच्च नगद पुरस्कार २ लाख २५ हजार सहित शिल्ड मेडल प्रमाणपत्र प्राप्त गर्नेछ ।

दोश्रो स्थान हाँसिल गर्ने टिमले नगद १ लाख १ हजार १ सय ११ रुपैया सहित शिल्ड मेडल प्रमाण पत्र पुरस्कार प्राप्त गर्ने क्लवद्वारा बिहीबार पोखरामा आयोजित पत्रकार सम्मेलनमा जानकारी दिइयो । प्रतियोगिताको सर्वोत्कृष्ट खेलाडी, उत्कृष्ट गोलकिपर, मिडफिल्डर, डिफेण्डर, सर्वाधिक गोलकर्तालाई नगद ५ हजार सहित ट्रफि तथा अनुशासित टोलीलाई ट्रफि प्रमाणपत्रले पुरस्कृत गरिने पनि सो अवसरमा जानकारी दिइयो ।

क्लवका अध्यक्ष रोशन गुरुङ्गका हजुरआमा विष्णुकुमारी गुरुङ्गको स्मृतीमा उनकै नामबाट प्रतियोगिता सञ्चालन गरिने छ । क्लवका उपाध्यक्ष तुलबहादुर गुरुङ्गले प्रतियोगितामा झण्डै ५० क्लवको सहभागिता रहने अपेक्षा गरेका छन् । प्रतियोगिता सम्पन्न गर्न झण्डै १० लाख खर्च लाग्ने आयोजकको अनुमान छ । प्रतियोगिताबाट करिब २ लाख बचत हुने र, बचत रकमबाट रामघाटमा फुटबल एकेडेमिको शुरुवात गर्ने लक्ष्य रहेको पत्रकार सम्मेलनमा सुनाए ।