‘ए’ डिभिजन लिग असोजमा सुरु हुने

- खेलाडी न्युज, पोखरा


     खेलाडी न्युज    
     जेठ २ गते २०७५ मा प्रकाशित


काठमाडौं (खेलाडी न्युज) पाँच वर्षपछि रोकिएको लिग फुटबल प्रतियोगित गर्ने निर्णय नव निर्वाचित एन्फा कार्यसमितिले गरेको छ ।

सहिद स्मारक ‘ए’ डिभिजन पाँच वर्षपछि यो वर्ष आयोजना हुने भएको छ । अखिल नेपाल फुटबल संघ ले असोज १३ गतेबाट ए डिभिजन लिग आयोजना गर्ने बुधबार घोषणा गरेको हो ।

कर्मा छिरिङको नेतृत्वमा नयाँ कार्यसमिति निर्वाचित भएलगत्तै ए डिभिजन लिग आयोजनाको मिति छिट्टै तय गर्ने घोषणा गरेको थियो । सोही घोषणा अनुरुप राष्ट्रिय टोलीका पूर्व खेलाडी एवंम् नेपाल पुलिसका पूर्व एआइजी विज्ञानराज शर्माको संयोजकत्वमा लिग कमिटी गरेको थियो । सोही कमिटीले १४ ए डिभजन क्लबका पदाधिकारीसँगको पटक पटकको छलफल पछि लिग आयोजनाको मिति तय गरिएको हो ।
एन्फा मुख्यालयमा बसेको कमिटिको बैठकले असोज १३ गतेबाट ‘ए’ डिभिजन लिग सुरु गरेर माघ १६ गते सम्पन्न गर्ने लक्ष्य राखेको छ ।

लिग कमिटिले एउटा टोलीले कम्तीमा १८ खेलाडी दर्ता गर्नु पर्ने र बढीमा ३५ खेलाडी राख्न पाउने प्राबधान राखेको छ । लिगमा एउटा टोलीले ४ विदेशी खेलाडी अनुबन्ध गर्न पाउने र एकपटकमा मैदानमा ३ खेलाडीलाई उतार्न पाउनेछन । खेलाडी दर्ता प्रक्रिया भदौ १५ बाट सुरु हुने बताइएको छ ।

ए डिभजन लिग २०७० सालयता हुन सकेको छैन । राष्ट्रिय लिगको पछिल्लो पटक २०७२ मा आयोजना भएको थियो । यसपटकको ‘ए’ डिभिजन लिगमा १४ टोलीले प्रतिस्पर्धा गर्नेछन् । लिगमा रुस्लान थ्री स्टार क्लब, लक्ष्मी हुण्डाई मनाङ–मस्र्याङ्दी क्लब, नेपाल पुलिस क्लब, नेपाली एपिएफ क्लब, त्रिभुवन आर्मी क्लब, जावलाखेल युथ क्लब छन् ।

त्यस्तै फ्रेन्डस् क्लब, संकटा क्लब, मच्छिन्द्र क्लब, सरस्वती युवा क्लब, च्यासल युथ क्लब, न्युरोड टिम एनआरटी, ब्रिगेड ब्वाइज क्लब हिमालयन शेर्पा क्लबले ए डिभिजनमा प्रतिस्पर्धा गर्नेछन् । लिग भएपछि नेपाली फुटबलको स्तर माथि उठ्ने विश्वास गरिएको छ । नेपाली फुटबल मोफसलमा हुने नकाउट फुटबल प्रतियोगिताले धानिरहेको अवस्था छ । पुर्व मेचीदेखि पश्चिम महाकालीसम्म विभिन्न क्लबले ठूलो धनराशीको पुरस्कार राख्दै प्रतियोगिता गर्दै आएका छन् ।