नुवाकोट गोल्डकपमा पोखरा ११ सेमिफाईनलमा

नुवाकोट(खेलाडी न्युज) नुवाकोटमा सञ्चालित विशाल सिमेन्ट प्रथम नुवाकोट गोल्डकप फुटबल प्रतियोगितामा पोखरा ११ अन्तिम चारमा प्रवेश गरेको छ । बट्टारस्थित स्थानीय खेलमैदानमा सम्पन्न खेलमा पोखराले एपिएफ क्लबलाई १-० गोलले पराजित गर्दै सेमिफाईनल सुरक्षित बनायो ।

पोखराका लागि खेलको तेस्रो मिनटमै मान बहादुर तामाङले एक मात्र निर्णायक गोल गरे । खेलको निर्णायक गोलकर्ता तामाङ म्यान अफ द म्याच समेत घोषित भए । जिल्ला खेलकुद विकास समिति र नुवाकोट जिल्ला फुटबल संघको संयुक्त आयोजनामा जारी प्रतियोगिताको विजेताले उपाधिसहित नगद ५ लाख प्राप्त गर्नेछ भने उपविजेताले ३ लाख हात पार्नेछ ।