मैत्रीपूर्ण खेलमा बेल्जियमको सहज जित

एजेन्सी-विश्वकप शुरु हुन दुईदिन मात्रै बाँकी छ । विश्वकपमा सहभागि देशहरु मैत्रीपूर्ण खेलमा उत्रिदै आएका छन् । गए राति विश्वकप मैत्रीपूर्ण खेल अन्तर्गत बेल्जियमले कोस्टा रिकालाई ४-१ ले हराएको छ । बेल्जियमको जितमा उसका स्ट्राइकर रोमेलु लुकाकुले दुई गोल गरे ।

कोस्टा रिकाका लागि उसका कप्तान ब्रायन रुइजले सुन्दर प्रहारद्वार खेलमा अग्रता दिलाएका थिए । तर ड्रायस मर्टेन्स र लुकाकुले गोल गर्दै पहिलो हाफमा स्कोर २-१ बनाए । दोस्रो हाफमा फेरी लुकाकु र उनकै पासमा मिची ब्याटसुवायीले गोल गर्दै बेल्जियमको सहज जित सुनिश्चित गरेका थिए । बेल्जियम र कोस्टा रिका दुवैले आफ्नो पहिलो रोजाईकै खेलाडीहरु मैदानमा उतारेका थिए तर खेलभरी बेल्जियम निकै आक्रामक देखिएको थियो ।

बेल्जियम विश्वकप समूह ‘जी’मा इंग्ल्यान्ड, पानामा र टुनिसियासंग रहेको छ भने कोस्टा रिका समूह ‘ई’मा ब्राजिल, सर्बिया र स्विट्जरल्यान्डसंग रहेको छ ।