२८ वर्षपछि इग्ल्याण्ड विश्वकपको सेमिफाईनलमा

एजेन्सी-दुवै गोल हेडिङबाट सम्भव बनाउँदै इग्ल्याण्डले स्वीडेनलाई पराजित गर्र्दै अन्तिम चारमा आफुलाई उभ्याउन सफल भयो । शनिबार राती भएको खेलमा २-० गोलले पराजित गर्दै इग्ल्याण्डले सेमिफाईनल सुरक्षित गर्दा स्वीडेनले भने आफुलाई त्यसभन्दा अगाडिको यात्राबाट विट मार्न विवश बन्यो ।

खेलको ३० औं मिनेटमा एस्ले योङको कर्नर पासमा ह्यारी मागुईरेको हेडिङ गोलमा परिणत भएपछि इग्ल्याण्डले खुशीयाली मनाउन थाल्यो । तर स्वीडेनले समेत बराबरी गर्ने अवसरलाई भने पटक पटक गुमाउन पुग्यो । ५८ औं मिनेटमा जेसस लिनगार्डले मिलाईदिएको क्रसपासमा डेले अलीले हानेको हेड पनि गोलमा परिणत भएपछि इग्ल्याण्डले सेमिफाईनल सुरक्षित बनायो ।

इग्ल्याण्डले सेमिफाईनलको यात्रा तय गरेको यो सन १९९० विश्वकप पछि हो । त्यतिबेला सेमिफाईनलमा भने इग्ल्याण्ड पेनाल्टी सुटआउटमा पराजित भएको थियो । त्यस भन्दा यता इग्ल्याण्डले सेमिफाईनल भन्दा अघि नै बाहिरिदै आएको थियो ।